آسٹریلیا کے دارالحکومت کینبرا سے تعلق رکھنے والے ایک اعزازی ٹاؤن کرائر جوزف میکگریل بیٹ اپ کو باضابطہ طور پر دنیا کا سب سے اونچی آواز والا شخص تسلیم کرلیا گیا ہے۔
گنیز ورلڈ ریکارڈز کی جانب سے جاری کردہ اعلامیے کے مطابق 58 سالہ جوزف نے 122.4 ڈیسیبل کی شدت کے ساتھ اب تک کی سب سے اونچی چیخ مارنے کا عالمی ریکارڈ قائم کیا ہے۔
یہ بھی پڑھیں: ایک گیمر نے 5 منٹ سے بھی کم وقت میں گنیز ورلڈ ریکارڈ کیسے توڑا؟
انہوں نے یہ تاریخی سنگ میل عبور کرنے کے لیے کینبرا کے ایک ریڈیو اسٹوڈیو میں پیشہ ورانہ آکوستک انجینیئر کی موجودگی میں ‘ناؤ’ کا لفظ پکارا تھا۔
ایسوسی ایٹڈ پریس کی رپورٹ کے مطابق جوزف نے شمالی آئرلینڈ کی ایک اسکول ٹیچر اینالیسا فلانیگن کا 32 سال پرانا ریکارڈ توڑا ہے جنہوں نے 1994 میں 121.7 ڈیسیبل کی شدت سے چیخ ماری تھی۔
جوزف کی جانب سے ریکارڈ کی گئی 122.4 ڈیسیبل کی یہ آواز ایک چین سا (آری)، ٹیک آف کرتے ہوئے جیٹ طیارے یا قریب سے گزرنے والے ایمبولینس سائرن کے شور کے برابر ہے۔
پیشے کے لحاظ سے ایئر کنڈیشنر کلینر جوزف کا کہنا ہے کہ اس ریکارڈ کے لیے پہلے سے مشق کرنا ممکن نہیں تھا کیونکہ مسلسل چیخنے سے آواز مکمل طور پر بیٹھ جاتی ہے۔
یہ بھی پڑھیں: گنیز ورلڈ ریکارڈ یافتہ دنیا کے معمر ترین شخص کا انتقال ہوگیا
جوزف میکگریل بیٹ اپ کو 2017 میں کینبرا کا اعزازی ٹاؤن کرائر مقرر کیا گیا تھا جس کے بعد انہوں نے مختلف کمیونٹی تقریبات اور شوز میں اعلانات کرنے کا سلسلہ شروع کیا۔
گنیز ورلڈ ریکارڈز کے پاس اس سے قبل صرف سب سے اونچی آواز والی خاتون کا ریکارڈ موجود تھا جبکہ جوزف اب دنیا کے سب سے بلند آواز مرد بن گئے ہیں۔
یہ دوسری بار ہے کہ جوزف نے کوئی عالمی ریکارڈ قائم کیا ہے، اس سے قبل وہ 2019 میں تیر اندازی کا ایک ریکارڈ بھی اپنے نام کرچکے ہیں۔
