وفاقی وزیر خزانہ محمد اورنگزیب نے کہا ہے کہ حکومت ملک کے بڑے چیمبرز آف کامرس میں جا کر تاجروں اور صنعتکاروں کے مسائل سن رہی ہے اور ان کے حل کے لیے بھرپور دلجمعی سے کام کیا جا رہا ہے۔
فیصل آباد چیمبر آف کامرس اینڈ انڈسٹری میں تقریب سے خطاب کرتے ہوئے وزیر خزانہ نے کہا کہ وفاقی بجٹ کی تیاری میں تاجروں اور صنعتکاروں کی تجاویز کو مدنظر رکھا گیا ہے، جبکہ آئندہ بجٹ کے لیے بھی ابھی سے مشاورت کا عمل شروع کیا جائے گا اور ملک بھر کے کاروباری حلقوں سے تجاویز حاصل کی جائیں گی۔
مزید پڑھیں:وفاقی وزیر خزانہ محمد اورنگزیب نے سینٹر فار گورنمنٹ ڈیٹا اینالیٹکس کا افتتاح کر دیا
محمد اورنگزیب نے تاجروں اور چیمبرز پر زور دیا کہ وہ ٹیکس وصولی کے نظام کو بہتر بنانے کے لیے فیڈرل بورڈ آف ریونیو (ایف بی آر) کے ساتھ بھرپور تعاون کریں تاکہ قومی آمدن میں اضافہ ممکن بنایا جا سکے۔
انہوں نے کہا کہ پالیسی ریٹ میں نمایاں کمی آئی ہے، تاہم ایران سے متعلق جنگی صورتحال کے باعث اس میں معمولی اضافہ دیکھنے میں آیا۔ ان کا کہنا تھا کہ حکومت برآمدکنندگان کو ہر ممکن سہولیات فراہم کر رہی ہے تاکہ ملکی برآمدات میں مزید اضافہ ہو سکے۔
مزید پڑھیں:ممکنہ وفاقی وزیر خزانہ محمد اورنگزیب کون ہیں؟
وفاقی وزیر خزانہ نے کہا کہ کاروبار کرنا نجی شعبے کا کام ہے، جبکہ سازگار کاروباری ماحول فراہم کرنا حکومت کی ذمہ داری ہے۔ انہوں نے یقین دہانی کرائی کہ چھوٹے اور درمیانے درجے کے کاروبار (ایس ایم ایز) کے لیے فنانسنگ میں مزید اضافہ کیا جائے گا تاکہ صنعتی اور معاشی سرگرمیوں کو فروغ مل سکے۔
