بالی وڈ کے معروف اداکار عامر خان نے اپنی دیرینہ ساتھی گوری سپراٹ سے سادہ اور نجی تقریب میں شادی کرلی، جس کے بعد یہ ان کی تیسری شادی بن گئی۔
شادی کی تقریب اتوار کے روز ممبئی میں عامر خان کی رہائش گاہ پر منعقد ہوئی، جہاں دونوں نے اسپیشل میرج ایکٹ کے تحت اپنی شادی رجسٹر کروائی۔ تقریب میں صرف قریبی اہل خانہ اور دوستوں نے شرکت کی، جبکہ عامر خان کے بچوں جنید، آئرہ اور آزاد سمیت خاندان کے دیگر افراد بھی موجود تھے۔
عامر خان اور گوری سپراٹ ایک دوسرے کو تقریباً 25 برس سے جانتے تھے، تاہم دونوں کے درمیان 2024 میں دوبارہ رابطہ ہوا، جس کے بعد ان کی قربت میں اضافہ ہوا اور رشتہ شادی تک جا پہنچا۔
Aamir Khan Ties The Knot For Third Time With Gauri Spratt, Kids From Previous Marriages Attend Wedding#aamirkhan
— News18 Showsha (@News18Showsha) July 5, 2026
عامر خان نے مارچ 2025 میں اپنی 60 ویں سالگرہ کے موقع پر پہلی مرتبہ گوری سپراٹ کو اپنی گرل فرینڈ کے طور پر عوام کے سامنے متعارف کرایا تھا، جس کے بعد ان کے تعلقات سے متعلق خبریں مسلسل میڈیا اور سوشل میڈیا پر گردش کرتی رہیں۔
یہ عامر خان کی تیسری شادی ہے۔ اس سے قبل وہ رینا دتا سے شادی کر چکے تھے، جن سے ان کے 2 بچے جنید اور آئرہ ہیں۔ بعد ازاں انہوں نے فلم ساز کرن راؤ سے شادی کی، جن سے ان کا ایک بیٹا آزاد ہے، تاہم بعد میں دونوں کی علیحدگی ہوگئی تھی۔
یہ بھی پڑھیں:عامر خان نے تیسری شادی کا اعلان کردیا، شادی کب اور کہاں ہوگی اور کون لوگ مدعو ہوں گے؟
گزشتہ چند روز سے عامر خان اور گوری سپراٹ کی شادی سے متعلق قیاس آرائیاں جاری تھیں، جنہیں اس نجی تقریب کے انعقاد کے بعد تقویت ملی۔ مداحوں اور شوبز شخصیات کی جانب سے نو بیاہتا جوڑے کے لیے نیک تمناؤں اور مبارک باد کے پیغامات کا سلسلہ بھی جاری ہے۔
