آزاد کشمیر قانون ساز اسمبلی کے دو انتخابی حلقوں میں انتخابی مہم کو مزید مؤثر بنانے کے لیے پاکستان مسلم لیگ (ن) نے اپنی سرگرمیاں تیز کر دی ہیں۔
پارٹی صدر نواز شریف کی ہدایت پر منعقدہ اہم اجلاس میں انتخابی حکمت عملی، پولنگ ڈے پلان اور ضلع جہلم کی چاروں تحصیلوں میں تنظیمی ذمہ داریوں کا جائزہ لیا گیا۔
یہ بھی پڑھیں: آزاد کشمیر میں امن و امان مزید مؤثر بنانے کا عزم، وزیراعظم فیصل ممتاز راٹھور کی اعلیٰ حکام سے اہم ملاقاتیں
اجلاس میں سینیئر پارلیمنٹیرین طاہرہ اورنگزیب، مسلم لیگ (ن) ضلع راولپنڈی کے صدر و رکن قومی اسمبلی ملک ابرار، سابق میئر راولپنڈی سردار نسیم خان، جہلم سے پارٹی کے مرکزی رہنما، آزاد کشمیر قانون ساز اسمبلی کے نامزد امیدوار راجہ محمد صدیق اور شوکت علی شاہ سمیت دیگر رہنماؤں نے شرکت کی۔
اجلاس میں سابق ارکان پنجاب اسمبلی مہر فیاض، چوہدری سعید، طلب مہدی، چوہدری بوٹا جاوید، حافظ اعجاز، چوہدری راشد اور دیگر پارٹی قائدین بھی موجود تھے۔
پاکستان مسلم لیگ (ن) کے صدر جناب محمد نواز شریف کی ہدایت پر آزاد کشمیر کے جہلم سے متعلق انتخابی حلقوں LA-39 اور LA-42 میں الیکشن کمپین کے حوالے سے آبائی گاؤں بدلوٹ میں میری رہائش گاہ پر جائزہ اجلاس ہوا۔ سینیئر رہنماؤں محترمہ طاہرہ اورنگزیب، ملک ابرار، سردار نسیم اور AJK اسمبلی کے… pic.twitter.com/2emncrDOIe
— Bilal Azhar Kayani (@BilalAKayani) July 5, 2026
اجلاس کے دوران ضلع جہلم میں انتخابی مہم کے حوالے سے گزشتہ اجلاس میں کیے گئے فیصلوں پر عمل درآمد کا تفصیلی جائزہ لیا گیا، جبکہ آئندہ مرحلے کی انتخابی حکمت عملی بھی مرتب کی گئی۔
شرکا نے ضلع جہلم کی چاروں تحصیلوں میں الیکشن مہم کے لیے سونپی گئی ذمہ داریوں پر پیشرفت کا جائزہ لیا اور پولنگ کے روز کے انتظامات اور حکمت عملی پر بھی تفصیلی مشاورت کی۔
اجلاس نے پارٹی کارکنوں اور رہنماؤں کے جذبے اور انتخابی مہم میں ان کی سرگرم شرکت کو سراہتے ہوئے گزشتہ اجلاس میں طے کردہ انتخابی حکمت عملی پر مزید غور کیا۔
مزید پڑھیں: آزاد کشمیر میں حکومت میں آئے تو عوام کی محرومیاں دور کریں گے، عبدالعلیم خان
اجلاس سے خطاب کرتے ہوئے وزیر مملکت برائے خزانہ و ریلوے بلال اظہر کیانی نے کہا کہ پارٹی صدر نواز شریف کی ہدایات کی روشنی میں انتخابی مہم بھرپور انداز میں جاری رکھی جائے گی، انہوں نے اجلاس میں شریک تمام رہنماؤں کا آمد پر شکریہ بھی ادا کیا۔
اجلاس سے خطاب کرنے والے پارٹی رہنماؤں نے اس عزم کا اظہار کیا کہ پاکستان مسلم لیگ (ن) کشمیر کاز کی مضبوطی اور کشمیری عوام کی ترقی و خوشحالی کی ضامن جماعت ہے اور پارٹی کارکن بھرپور محنت سے انتخابی مہم کو کامیاب بنائیں گے۔
