پاکستان نے خطے میں بڑھتی ہوئی کشیدگی پر گہری تشویش کا اظہار کرتے ہوئے خبردار کیا ہے کہ تنازع کا دوبارہ بھڑک اٹھنا کسی بھی فریق کے مفاد میں نہیں۔
دفتر خارجہ کی جانب سے جاری بیان میں کہا گیا ہے کہ پاکستان تمام متعلقہ فریقوں پر زور دیتا ہے کہ وہ تحمل کا مظاہرہ کریں اور ایسے کسی بھی اقدام سے گریز کریں جو خطے کے امن اور استحکام کو مزید نقصان پہنچا سکتا ہو۔
🔊PR No.1️⃣6️⃣7️⃣/2️⃣0️⃣2️⃣6️⃣
Press Release https://t.co/8BcND3LSHM
🔗⬇️ pic.twitter.com/sDWaaOFYQ6
— Ministry of Foreign Affairs – Pakistan (@ForeignOfficePk) July 8, 2026
بیان میں کہا گیا کہ خطے میں پائیدار امن کے مشترکہ ہدف کے حصول کے لیے مسلسل رابطے، بامعنی مذاکرات اور سفارت کاری ہی واحد مؤثر راستہ ہیں اور ان کا کوئی متبادل نہیں۔
پاکستان نے تمام فریقوں پر زور دیا کہ وہ اسلام آباد مفاہمتی یادداشت (اسلام آباد ایم او یو) کے تحت کیے گئے اپنے اپنے وعدوں اور ذمہ داریوں کی پاسداری کریں، جو باہمی اعتماد، احترام اور خطے سمیت وسیع تر عالمی سطح پر مشترکہ خوشحالی کے لیے ایک مضبوط اور دیرپا بنیاد کی حیثیت رکھتی ہے۔
دفتر خارجہ نے اپنے بیان میں اس عزم کا اعادہ کیاکہ پاکستان خطے میں امن، استحکام اور کشیدگی کے خاتمے کے لیے اپنا تعمیری کردار ادا کرنے کے لیے بدستور تیار ہے۔
مزید پڑھیں: کسی صورت ایٹم بم نہیں بنانے دیں گے، ڈونلڈ ٹرمپ کی آج رات ایران پر بڑے حملے کی دھمکی
واضح رہے کہ امریکا اور ایران کے درمیان ایک بار پھر کشیدگی بڑھ گئی، اور صدر ٹرمپ نے دھمکی دی ہے کہ آج رات ایران کو ایک بار پھر نشانہ بنایا جا سکتا ہے۔
