سعودی عرب کے علاقے الباحہ میں واقع رغدان جنگل کو موسمِ گرما کی سیاحتی سرگرمیوں کے پیشِ نظر دلکش رنگ برنگی روشنیوں سے سجا دیا گیا ہے، جس کے بعد یہ مقام سیاحوں کے لیے مزید پرکشش بن گیا ہے۔
مزید پڑھیں:جدہ میں مجوزہ کرکٹ اسٹیڈیم کا دورہ، سعودی عرب جلد بین الاقوامی کرکٹ کی میزبانی کرے گا، محسن نقوی
سروات پہاڑی سلسلے میں الباحہ شہر کے مغرب میں واقع رغدان جنگل اپنی معتدل آب و ہوا، گھنے درختوں اور قدرتی حسن کے باعث مملکت کے نمایاں سیاحتی مقامات میں شمار ہوتا ہے۔ جنگل میں 650 میٹر طویل ’الغیم واک وے‘ کو 65 روشنی کے کھمبوں سے روشن کیا گیا ہے، جبکہ مرکزی لیونڈر گارڈن میں 270 آرائشی لائٹس اور خوبصورت مجسمے نصب کیے گئے ہیں۔
موسمِ گرما کے دوران جنگل میں انٹرایکٹو لیزر شوز، متحرک روشنیوں کی نمائش اور قدرتی ماحول سے ہم آہنگ روشن آبشاریں بھی سیاحوں کی توجہ کا مرکز بنی ہوئی ہیں۔
قریباً 4 لاکھ 83 ہزار مربع میٹر رقبے پر پھیلے اس جنگل میں 3 لاکھ 84 ہزار مربع میٹر سرسبز و شاداب گرین ایریا موجود ہے۔ یہاں 14 بچوں کے کھیل کے میدان، ایک ہزار 230 گاڑیوں کی پارکنگ کی سہولت اور خصوصی افراد کے لیے بھی آسان رسائی کا انتظام کیا گیا ہے۔
مزید پڑھیں:سعودی عرب دوبارہ عرب سول ایوی ایشن تنظیم کی ایگزیکٹو کونسل کا رکن منتخب
رغدان جنگل اپنی گھنی نباتات، قدیم جونیپر (عرعر) کے درختوں، بادلوں اور دھند کے دلکش مناظر کے باعث قدرت سے محبت کرنے والوں، اہلِ خانہ، پکنک منانے والوں اور فوٹوگرافی کے شوقین افراد کے لیے ایک منفرد اور پسندیدہ تفریحی مقام بن چکا ہے۔
