جاپان میں گھریلو جھگڑے کا ایک نہایت حیران کن اور سفاک واقعہ سامنے آیا ہے، جہاں ایک خاتون نے مبینہ طور پر اپنے ساتھ رہنے والی خاتون کے ہونٹ سوئی اور دھاگے سے سی دیے۔ پولیس نے کارروائی کرتے ہوئے ملزمہ کو گرفتار کر لیا ہے، جبکہ واقعے کی مختلف پہلوؤں سے تحقیقات جاری ہیں۔
غیر ملکی میڈیا رپورٹس کے مطابق یہ واقعہ 29 جون کو ٹوکیو کے قریب واقع کوگا شہر میں پیش آیا۔ پولیس کا کہنا ہے کہ 42 سالہ متاثرہ خاتون اور 49 سالہ ملزمہ ماسائے ساکورائی ایک ہی گھر میں رہائش پذیر تھیں۔
یہ بھی پڑھیے پرانی دشمی یا اتفاق : ہاتھی نے ایک ہی خاندان کا چوتھا فرد بھی تلاش کرکے ہلاک کردیا
ابتدائی تحقیقات کے مطابق دونوں خواتین کے درمیان معمولی بات پر تلخ کلامی ہوئی، جو دیکھتے ہی دیکھتے پُرتشدد جھگڑے میں تبدیل ہوگئی۔ الزام ہے کہ غصے میں آ کر ملزمہ نے سوئی اور دھاگے کی مدد سے متاثرہ خاتون کے ہونٹ سی دیے۔
پولیس کے مطابق زخمی خاتون کسی طرح گھر سے نکلنے میں کامیاب ہوئی اور قریبی دکان تک پہنچی، جہاں اس کی حالت دیکھ کر دکاندار نے فوری طور پر پولیس اور امدادی اہلکاروں کو اطلاع دی۔ خاتون کو طبی امداد کے لیے اسپتال منتقل کیا گیا، جہاں اس کا علاج کیا گیا۔
پولیس اہلکار ماکوتو ہیاما نے بتایا کہ جائے وقوعہ سے شواہد اکٹھے کرنے اور ابتدائی تفتیش مکمل کرنے کے بعد پیر کے روز ماسائے ساکورائی کو جسمانی حملے کے الزام میں گرفتار کر لیا گیا۔
یہ بھی پڑھیے ڈیٹنگ ایپ ‘بمبل’ پر پہلی ملاقات کے بعد نوجوان کو انکار مہنگا پڑ گیا، خاتون جنونی عاشق بن گئی
جاپان کے سرکاری نشریاتی ادارے این ایچ کے کے مطابق پولیس اس بات کا بھی جائزہ لے رہی ہے کہ آیا واقعے کے وقت گھر میں ان دونوں خواتین کے علاوہ کوئی اور شخص بھی موجود تھا یا نہیں، کیونکہ اس حوالے سے بعض اطلاعات موصول ہوئی ہیں، تاہم ان کی ابھی تک تصدیق نہیں ہو سکی۔
تحقیقاتی حکام دونوں خواتین کے باہمی تعلقات، ایک ہی گھر میں رہائش کی نوعیت اور واقعے سے قبل پیش آنے والے حالات کا بھی تفصیلی جائزہ لے رہے ہیں تاکہ واقعے کے محرکات کا تعین کیا جا سکے۔
پولیس کا کہنا ہے کہ تفتیش مکمل ہونے کے بعد ملزمہ کے خلاف قانونی کارروائی کو مزید آگے بڑھایا جائے گا، جبکہ اس سے مسلسل پوچھ گچھ جاری ہے۔
