سندھ کے سینیئر وزیر شرجیل انعام میمن نے، بظاہر مولانا فضل الرحمان کے حالیہ بیان پر ردعمل دیتے ہوئے، کہا ہے کہ وطن کے دفاع میں جانوں کا نذرانہ پیش کرنے والے شہدا اور غازی پوری قوم کا فخر ہیں، جبکہ ان کی قربانیوں کو معمولی قرار دینا افسوسناک اور ناقابلِ قبول ہے۔
مزید پڑھیں:پنجاب اسمبلی میں مولانا فضل الرحمان کے بیان کے خلاف قرارداد جمع، قانونی کارروائی کا مطالبہ
اپنے بیان میں شرجیل انعام میمن نے کہا کہ افواجِ پاکستان نے دہشتگردی کے خلاف جنگ، سرحدوں کے دفاع اور قومی سلامتی کے تحفظ کے لیے بے مثال قربانیاں دی ہیں، جنہیں پوری قوم قدر کی نگاہ سے دیکھتی ہے۔
انہوں نے کہا کہ پاکستان کی مسلح افواج کی قربانیوں کا احترام ہر پاکستانی کی قومی اور اخلاقی ذمہ داری ہے، جبکہ شہدا کے اہلِخانہ کی قربانیوں کو نظر انداز کرنا یا ان پر غیر ذمہ دارانہ تبصرے کرنا مناسب نہیں۔
شرجیل میمن کا کہنا تھا کہ جمہوریت میں اختلافِ رائے ہر شہری کا حق ہے، تاہم شہدا کے خلاف ہرزہ سرائی قومی یکجہتی اور قومی مفاد کے منافی ہے۔
انہوں نے مزید کہا کہ سیاسی اختلافات کو قومی سلامتی اور وطن کے دفاع سے وابستہ اداروں کے احترام سے الگ رکھا جانا چاہیے، جبکہ سیاسی اور سماجی حلقوں کو ایسی زبان کے استعمال سے گریز کرنا چاہیے جس سے قومی اداروں یا شہدا کے لواحقین کے جذبات مجروح ہوں۔
