ہوائی اڈوں کی آؤٹ سورسنگ جلد مکمل کرنے کا ہدف، کراچی اور لاہور ایئرپورٹس سے کتنی سرمایہ کاری متوقع؟

حکومت پاکستان نے اسلام آباد انٹرنیشنل ایئرپورٹ کی نجی شعبے کو منتقلی کے منصوبے پر عملدرآمد تیز کرتے ہوئے آئندہ 9 ماہ کے اندر آؤٹ سورسنگ کا عمل مکمل کرنے کا ہدف مقرر کر دیا۔

میڈیا رپورٹس کے مطابق توقع کی جا رہی ہے کہ اسلام آباد کے بعد کراچی اور لاہور کے بین الاقوامی ایئرپورٹس کی آؤٹ سورسنگ کے ذریعے مجموعی طور پر ایک ارب ڈالر سے زائد نئی غیر ملکی سرمایہ کاری پاکستان آئے گی جس سے ہوا بازی کے شعبے میں جدید سہولتوں، بہتر خدمات اور بین الاقوامی معیار کی سرمایہ کاری کو فروغ ملے گا۔

یہ بھی پڑھیں: اسلام آباد ایئرپورٹ آؤٹ سورس کرنے سے متعلق اہم اجلاس

حکومت کا اندازہ ہے کہ دونوں منصوبوں کے ذریعے 500، 500 ملین ڈالر یعنی مجموعی طور پر ایک ارب ڈالر سے زائد نئی غیر ملکی سرمایہ کاری حاصل کی جا سکے گی۔

اسلام آباد ایئرپورٹ

اعلیٰ حکام کے مطابق اسلام آباد انٹرنیشنل ایئرپورٹ کی آؤٹ سورسنگ کا پورا عمل 9 ماہ میں مکمل کر لیا جائے گا جبکہ ابتدائی جانچ پڑتال اور تیاری کا مرحلہ اگلے 3 ماہ میں مکمل ہونے کی توقع ہے۔

حکام کے مطابق حکومت کی کوشش ہے کہ رواں مالی سال کے دوران ہی اسلام آباد انٹرنیشنل ایئرپورٹ کو طویل المدتی رعایتی فریم ورک کے تحت کسی اہل نجی آپریٹر کے حوالے کر دیا جائے۔

مزید پڑھیے: اسلام آباد ایئرپورٹ کی آؤٹ سورسنگ کے لیے نجکاری کمیشن اور ایشیائی ترقیاتی بینک میں معاہدہ

حکومت نے اسلام آباد انٹرنیشنل ایئرپورٹ کے آپریشنز نجی شعبے کے حوالے کرنے کے لیے ایشیائی ترقیاتی بینک (اے ڈی بی) کو باضابطہ طور پر مالیاتی اور ٹرانزیکشن مشیر مقرر کر دیا ہے۔ اس مقصد کے لیے دونوں فریقین کے درمیان ٹرانزیکشن ایڈوائزری سروسز ایگریمنٹ (ٹاسا) پر دستخط بھی کیے جا چکے ہیں جو پاکستان کی نجکاری کی تاریخ میں پہلا موقع ہے کہ کسی کثیرالجہتی مالیاتی ادارے کو اس نوعیت کی ذمہ داری سونپی گئی ہے۔

معاہدے پر نجکاری کمیشن کے ڈائریکٹر جنرل شاہد دایو اور ایشیائی ترقیاتی بینک کی کنٹری ڈائریکٹر ایما فین نے دستخط کیے جبکہ تقریب کی صدارت وزیراعظم کے مشیر برائے نجکاری اور چیئرمین نجکاری کمیشن محمد علی نے کی۔

معاہدے کے تحت ایشیائی ترقیاتی بینک بین الاقوامی معیار کے مطابق تکنیکی، مالیاتی، قانونی، ماحولیاتی اور تجارتی معاونت فراہم کرے گا تاکہ شفاف، مسابقتی اور مارکیٹ پر مبنی عمل کے ذریعے دنیا کے معروف ایئرپورٹ آپریٹرز اور سرمایہ کاروں کو اس منصوبے میں شامل کیا جا سکے۔

مزید پڑھیں: لاہور، کراچی اور اسلام آباد ایئرپورٹس پر خودکار امیگریشن نظام متعارف کرانے کی تیاریاں مکمل

دوسری جانب نجکاری کمیشن کے بورڈ نے آڈٹ کمیٹی کی سفارش پر چارٹرڈ اکاؤنٹنسی فرم بی ڈی او ابراہیم اینڈ کمپنی کو مالی سال 2025-26 سے 2027-28 تک بیرونی آڈیٹر مقرر کرنے کی بھی منظوری دے دی۔

حکومت کا کہنا ہے کہ اسلام آباد سمیت دیگر بین الاقوامی ایئرپورٹس کی آؤٹ سورسنگ اور نجکاری کے پورے عمل میں شفافیت، میرٹ اور بین الاقوامی معیار کو یقینی بنایا جائے گا تاکہ سرمایہ کاروں کا اعتماد مزید مضبوط ہو اور پاکستان میں غیر ملکی سرمایہ کاری کے نئے مواقع پیدا ہوں۔