معروف اداکارہ اور میزبان صنم جنگ نے انکشاف کیا ہے کہ پاکستان واپسی کے بعد صرف ایک ماہ کے دوران ان پر ٹریفک قوانین کی خلاف ورزی کے چھ چالان عائد کیے گئے ہیں جن میں سے بعض کو انہوں نے درست جبکہ کچھ کو غلط قرار دیا ہے۔
صنم جنگ نے سوشل میڈیا پر اپنے تجربے کا اظہار کرتے ہوئے بتایا کہ چند چالان ان کی اپنی غلطیوں کی وجہ سے ہوئے جنہیں وہ تسلیم کرتی ہیں۔ ان کے مطابق ایک موقع پر گاڑی چلاتے ہوئے موبائل فون استعمال کرنے پر ان کا چالان کیا گیا جو بالکل درست تھا۔
View this post on Instagram
تاہم انہوں نے کہا کہ کچھ چالان ایسے بھی موصول ہوئے جن میں ایسی خلاف ورزیاں درج تھیں جو انہوں نے کی ہی نہیں تھیں۔ اداکارہ کے مطابق انہیں سیٹ بیلٹ نہ پہننے پر بھی چالان کیا گیا حالانکہ وہ ہمیشہ سیٹ بیلٹ باندھ کر ہی گاڑی چلاتی ہیں۔
صنم جنگ نے بتایا کہ ’مجھے بیرونِ ملک رہنے کی وجہ سے سیٹ بیلٹ پہننے کی عادت ہے، میں تو سیٹ بیلٹ باندھے بغیر گاڑی اسٹارٹ بھی نہیں کرتی‘۔ انہوں نے حیرانی کا اظہار کرتے ہوئے کہا کہ ایسے چالان بھی موصول ہو رہے ہیں جن کا حقیقت سے کوئی تعلق نہیں جس کی وجہ سے انہیں گھر والوں کی ڈانٹ بھی سننا پڑ رہی ہے۔
یہ بھی پڑھیں: ادکارہ صنم جنگ امریکا میں کیا کررہی ہیں؟
اداکارہ کی یہ پوسٹ سوشل میڈیا پر تیزی سے وائرل ہو گئی جہاں صارفین نے اس معاملے پر مختلف آرا کا اظہار کیا۔ کئی افراد نے مزاحیہ انداز میں انہیں ’پاکستان میں خوش آمدید‘ کہا جبکہ بعض صارفین نے دعویٰ کیا کہ انہیں بھی سیٹ بیلٹ پہنے ہونے کے باوجود چالان موصول ہوا تھا۔ ان کے مطابق متعلقہ دفتر سے رجوع کرنے پر معلوم ہوا کہ کپڑوں اور سیٹ بیلٹ کا رنگ ایک جیسا ہونے کی وجہ سے کیمرے نے غلط شناخت کی جس کے بعد چالان درست کر دیا گیا۔
