وزیراعلیٰ بلوچستان سرفراز بگٹی نے بلوچستان ویمن انٹرپرینیور شپ ڈویلپمنٹ پروگرام کے پہلے مرحلے کی کامیاب تکمیل پر تمام شریک خواتین کو مبارکباد دیتے ہوئے کہا ہے کہ خواتین کو جدید کاروباری مہارتوں، ڈیجیٹل ٹولز اور کاروباری مواقع سے جوڑنا حکومت بلوچستان کے وژن کا اہم حصہ ہے۔
مزید پڑھیں:سرکاری نوکریاں آن لائن میرٹ پر تقسیم ہوں گی، وزیراعلیٰ بلوچستان سرفراز بگٹی کا اعلان
سماجی رابطے کی ویب سائٹ ایکس پر اپنے بیان میں وزیراعلیٰ نے کہا کہ صوبائی حکومت خواتین کی معاشی خودمختاری، ہنرمندی اور بااختیار بنانے کے لیے ایسے عملی اقدامات کا سلسلہ جاری رکھے گی تاکہ وہ نہ صرف اپنے خاندانوں بلکہ بلوچستان اور پاکستان کی معاشی ترقی میں بھی مؤثر کردار ادا کر سکیں۔
بلوچستان ویمن انٹرپرینیورشپ ڈیولپمنٹ پروگرام کے پہلے مرحلے کی کامیاب تکمیل پر تمام باہمت اور باصلاحیت خواتین کو دلی مبارکباد پیش کرتا ہوں ، خواتین کو جدید کاروباری مہارتوں، ڈیجیٹل ٹولز اور کاروباری مواقع سے جوڑنا حکومت بلوچستان کے ویژن کا اہم حصہ ہے۔ ہماری حکومت خواتین کی معاشی… https://t.co/TQPCjvic8E
— Sarfraz Bugti (@PakSarfrazbugti) July 17, 2026
انہوں نے پروگرام کی کامیابی پر صوبائی وزیر ڈاکٹر ربابہ خان بلیدی اور محکمہ ترقیِ نسواں کی ٹیم کو خراجِ تحسین پیش کیا۔
دوسری جانب ڈاکٹر ربابہ خان بلیدی نے بتایا کہ پروگرام کے پہلے مرحلے کی کامیاب تکمیل پر 500 خواتین کو کاروباری تربیت اور ڈیجیٹل مہارتوں کی تعلیم مکمل کرنے کے بعد ٹیبلٹس، کاروباری ٹول کٹس اور اسناد فراہم کی گئیں۔
مزید پڑھیں:وزیراعلیٰ بلوچستان سرفراز بگٹی کے خلاف توہین عدالت کی درخواست دائر
انہوں نے کہا کہ خواتین کو بااختیار بنانا ایک مضبوط بلوچستان کی بنیاد ہے، اور صوبے بھر کی خواتین کے لیے مزید مواقع پیدا کرنے کے عزم کے ساتھ یہ سلسلہ آئندہ بھی جاری رکھا جائے گا۔
