امریکی طیارہ ساز کمپنی بوئنگ کے چیف ایگزیکٹو افسر کیلی اورٹ برگ نے کہا ہے کہ کمپنی کو نیا کمرشل طیارہ متعارف کرانے سے پہلے اپنی مالی صورتحال بہتر بنانے کے لیے مزید ’چند سال‘ درکار ہیں۔
انہوں نے کہا کہ فی الحال کمپنی کی ترجیح اپنے موجودہ طیاروں کی تیاری، معیار اور کارکردگی کو بہتر بنانا ہے، نہ کہ فوری طور پر کسی نئے ماڈل کی تیاری شروع کرنا۔
یہ بھی پڑھیں: 2045 تک دنیا میں تجارتی طیاروں کی تعداد 50 ہزار تک پہنچ جائے گی، بوئنگ کمپنی کی پیش گوئی
بوئنگ کے سربراہ نے بتایا کہ نئے طیارے کے منصوبے پر عمل درآمد سے قبل کمپنی کو تین اہم مراحل مکمل کرنے ہوں گے، جن میں مالی استحکام، نئی ٹیکنالوجی کی تیاری اور مارکیٹ میں طلب کا جائزہ شامل ہے۔
کیلی اورٹ برگ نے کہا کہ ’ہمیں سب سے پہلے اپنے مالی معاملات درست کرنے ہوں گے اور اس مقصد کے حصول میں مزید چند سال لگ سکتے ہیں۔‘
انہوں نے بتایا کہ ایئر لائن کمپنیاں بھی بوئنگ سے فی الحال نئے طیارے کے بجائے موجودہ طیاروں کی تیاری میں بہتری، بروقت فراہمی اور زیادہ قابل اعتماد کارکردگی پر توجہ دینے کا مطالبہ کر رہی ہیں۔
یہ بھی پڑھیں: پی آئی اے کے بیڑے میں 16 نئے طیارے شامل کرنے کا پلان، محسن نقوی کی بوئنگ حکام سے ملاقات
بوئنگ کئی برسوں سے پیداواری مسائل اور حفاظتی خدشات کا سامنا کر رہی ہے۔ جنوری 2024 میں ایک بوئنگ طیارے کے دروازے کے حصے میں پیش آنے والے واقعے کے بعد کمپنی کو معیار کے حوالے سے شدید دباؤ کا سامنا کرنا پڑا تھا۔
بوئنگ اور یورپی کمپنی ایئربس دنیا کی بڑی کمرشل طیارہ ساز کمپنیاں ہیں، جبکہ ایئربس کے ’اے 320‘ طیاروں کے مقابلے کے لیے بوئنگ کو مستقبل میں ایک نئے طیارے کی ضرورت ہو سکتی ہے۔
ایئربس کے سربراہ گیوم فاؤری نے بھی کہا ہے کہ کمپنی 2030 کے بعد نئی نسل کے ایک سنگل آئل طیارے پر کام کرنے کا ارادہ رکھتی ہے تاکہ مارکیٹ میں اپنی برتری برقرار رکھ سکے۔
ایئر فورس ون منصوبہ بھی تاخیر کا شکار
بوئنگ کے سربراہ نے امریکی صدر کے خصوصی طیارے ’ایئر فورس ون‘ کے نئے منصوبے کے حوالے سے بھی بتایا کہ کمپنی 2028 تک اس کی فراہمی کے لیے اضافی اخراجات کرے گی اور انجینئرنگ و پیداواری عملے میں اضافہ کرے گی۔
انہوں نے کہا کہ منصوبے کو مکمل کرنے کے لیے متعدد شفٹوں میں کام کیا جائے گا۔ یہ منصوبہ پہلے ہی کئی تاخیر کا شکار ہوچکا ہے اور اسے ابتدائی طور پر 2024 میں مکمل ہونا تھا۔
