نئے  برطانوی وزیراعظم اینڈی برنہم کا پہلا بڑا اقدام، بجلی کے بلوں پر ٹیکس ختم کرنے کا اعلان

برطانیہ کے نئے وزیراعظم اینڈی برنہم نے عہدہ سنبھالتے ہی عوام کو مہنگائی کے بحران سے ریلیف دینے کے لیے پہلا بڑا فیصلہ کرلیا۔ حکومت نے گھریلو بجلی کے بلوں پر عائد ویلیو ایڈڈ ٹیکس ختم کرنے کا اعلان کیا ہے، جس سے اوسط گھرانے کے سالانہ بجلی اخراجات میں تقریباً 45 پاؤنڈ کی کمی متوقع ہے۔

اینڈی برنہم نے منگل کے روز اعلان کیا کہ ان کی حکومت یکم اکتوبر سے گھریلو بجلی کے بلوں سے ویلیو ایڈڈ ٹیکس ختم کردے گی، جس کے نتیجے میں ایک اوسط گھرانے کے سالانہ تقریباً 1862 پاؤنڈ کے بجلی بل میں لگ بھگ 45 پاؤنڈ کی کمی آئے گی۔

برطانوی وزیراعظم نے کہا کہ ان کی حکومت فوری اقدامات کے ذریعے توانائی کے بلوں پر ٹیکس کم کرنا، عوام کی جیب میں زیادہ رقم واپس لانا اور لوگوں میں امید پیدا کرنا چاہتی ہے۔

انہوں نے کہا کہ اس اقدام کے لیے مالی وسائل حکومت کے اس فیصلے سے حاصل ہوں گے جس کے تحت 1.8 ارب پاؤنڈ مالیت کے ڈیجیٹل شناختی کارڈ پروگرام کو ختم کیا گیا ہے۔

برنہم نے بیان میں کہا، ’ہم توانائی کے بلوں پر ٹیکس کم کرنے، لوگوں کو مالی دباؤ سے کچھ ریلیف دینے اور امید بحال کرنے کے لیے فوری کارروائی کر رہے ہیں۔‘

عوام کو فوری ریلیف دینے کی کوشش

56 سالہ اینڈی برنہم، جو اس سے قبل گریٹر مانچسٹر کے میئر رہ چکے ہیں، چاہتے ہیں کہ ابتدائی اقدامات کے ذریعے عوام کو یہ پیغام دیا جائے کہ ان کی حکومت عام شہریوں کے مسائل حل کرنے کے لیے سنجیدہ ہے۔

انہوں نے پیر کے روز کہا تھا کہ ابتدائی اقدامات مہنگائی سے متاثر تمام افراد کے مسائل مکمل طور پر ختم نہیں کرسکیں گے، تاہم حکومت رواں سال کے آخر میں ایک طویل المدتی منصوبہ بھی پیش کرے گی۔

تاہم برنہم کے منصوبے پر ان کی اپنی جماعت کے بعض رہنماؤں کی جانب سے سوالات اٹھائے گئے ہیں۔ سابق وزیراعظم کیئر اسٹارمر کے اتحادی ڈیرن جونز نے کہا کہ ڈیجیٹل شناختی منصوبہ پہلے ہی مالی وسائل کے بغیر تھا اور حکومت کو واضح کرنا ہوگا کہ نئے اقدامات کے اخراجات کیسے پورے کیے جائیں گے۔

انہوں نے سماجی رابطے کی ویب سائٹ ایکس پر کہا کہ حکومت کو بجٹ میں اپنی نئی پالیسیوں کے لیے مالی منصوبہ پیش کرنا ہوگا۔

ماہرین کا کہنا ہے ریلیف محدود ہوسکتا ہے

توانائی کے شعبے کے ماہرین نے خبردار کیا ہے کہ ٹیکس میں کمی کا اثر محدود ہوسکتا ہے، کیونکہ مشرق وسطیٰ میں جاری تنازعات کے باعث گیس کی قیمتوں میں اضافہ ہوا ہے، جس کے نتیجے میں اکتوبر میں توانائی بلوں کی قیمتوں کی حد (Price Cap) بڑھنے کا امکان ہے۔

برطانیہ میں توانائی کے اخراجات مہنگائی کے بحران کی بڑی وجوہات میں شامل رہے ہیں۔ 2022 میں روس کے یوکرین پر حملے کے بعد عالمی سطح پر گیس کی قیمتوں میں اضافے نے برطانوی توانائی مارکیٹ کو شدید متاثر کیا تھا۔

یہ بھی پڑھیے برطانیہ کو نیا وزیراعظم مل گیا، اینڈی برنہم نے شاہ چارلس سے ملاقات کے بعد حکومت سنبھال لی

اس وقت کی کنزرویٹو حکومت نے توانائی قیمتوں کو قابو میں رکھنے کے لیے اربوں پاؤنڈ خرچ کرکے گھریلو صارفین کو تحفظ فراہم کیا تھا، تاہم 2023 کے وسط سے قیمتوں میں کمی کے باوجود توانائی کے اخراجات اب بھی بحران سے پہلے کے مقابلے میں تقریباً 60 فیصد زیادہ ہیں۔

کم آمدنی والے خاندانوں کے لیے کام کرنے والے ادارے اینڈ فیول پاورٹی کولیشن نے حکومت کے اقدام کا خیر مقدم کرتے ہوئے کہا کہ یہ مثبت ارادے کی علامت ہے، تاہم یہ عوام کو درپیش مشکلات کے حجم کا مکمل حل نہیں۔

ریزولوشن فاؤنڈیشن کی چیف ایگزیکٹو روتھ کرٹس نے کہا کہ چونکہ ٹیکس میں کمی سب کے لیے یکساں ہوگی، اس لیے اس سے زیادہ آمدنی والے خاندانوں کو بھی فائدہ پہنچے گا۔ ان کے مطابق زیادہ مؤثر طریقہ یہ ہوتا کہ امداد صرف ضرورت مند گھرانوں تک محدود رکھی جاتی۔

برنہم کی نظر عوامی اعتماد بحال کرنے پر

اینڈی برنہم نے کہا ہے کہ وہ آنے والے دنوں میں مزید اقدامات کا اعلان کریں گے تاکہ خاص طور پر کم آمدنی والے طبقات کو فوری ریلیف محسوس ہو۔

سیاسی مبصرین کے مطابق برنہم کی حکمت عملی کا مقصد حکمران لیبر پارٹی کے لیے عوامی حمایت دوبارہ حاصل کرنا اور دائیں بازو کی جماعت ریفارم یو کے کے بڑھتے اثر و رسوخ کا مقابلہ کرنا ہے، جس کی قیادت بریگزٹ مہم کے رہنما نائجل فراج کر رہے ہیں۔

برنہم کو گریٹر مانچسٹر کے مضبوط دفاع کی وجہ سے ’کنگ آف دی نارتھ‘ بھی کہا جاتا ہے اور وہ اس وقت برطانیہ کی بڑی سیاسی جماعتوں کے مقبول ترین رہنماؤں میں شمار ہوتے ہیں۔

یہ بھی پڑھیے برطانیہ کو ‘سرکٹ بریکر’ کی ضرورت ہے، نئے وزیراعظم اینڈی برنہم کا پہلا خطاب، مہنگائی میں ریلیف کا اعلان

تاہم برطانیہ میں گزشتہ ایک دہائی کے دوران وزرائے اعظم کی بار بار تبدیلی نے یہ ظاہر کیا ہے کہ عوامی توقعات پوری نہ کرنے والے رہنماؤں کے خلاف سیاسی جماعتیں تیزی سے اپنا موقف تبدیل کرسکتی ہیں۔

وزیراعظم کے طور پر اپنی پہلی تقریر میں برنہم نے برطانیہ میں بے گھر افراد کے سڑکوں پر سونے کے مسئلے کو ختم کرنے کا عزم ظاہر کیا تھا۔ توقع ہے کہ وہ بس کرایوں کی حد مقرر کرنے جیسے اقدامات پر بھی غور کریں گے، جیسا کہ انہوں نے مانچسٹر میں بطور میئر کیا تھا۔

دوسری جانب مالیاتی منڈیوں کی نظریں اس بات پر ہیں کہ اینڈی برنہم اور ان کے نئے وزیر خزانہ جان ہیلی ان اقدامات کے لیے مالی وسائل کیسے فراہم کریں گے، کیونکہ پیر کے روز حکومتی قرضوں کی لاگت میں اضافہ ریکارڈ کیا گیا تھا۔