وزیراعلیٰ پنجاب مریم نواز نے کہا ہے کہ الیکشن کا فیصلہ ریاست نہیں عوام کرتے ہیں، پیپلز پارٹی کو کھلے دل سے شکست تسلیم کرنی چاہیے، بلاول بھٹو کو سیاسی بیان بازی کے بجائے اپنے بیانیے اور کام پر توجہ دینی چاہیے۔
اپنے ویڈیو بیان میں وزیراعلیٰ پنجاب مریم نواز نے کہا کہ آزاد کشمیر کے عوام نے ترقی کے نشان پر مہر لگا کر مسلم لیگ (ن) پر اعتماد کا اظہار کیا ہے۔ انہوں نے کامیابی پر پارٹی کارکنوں کی محنت کو بھی سراہا۔
یہ بھی پڑھیں: مریم نواز کا ایک اور وعدہ پورا، مظفرآباد کے بعد میرپور میں بھی الیکٹرک بسیں پہنچ گئیں
بلاول بھٹو زرداری کے بیان پر ردعمل دیتے ہوئے مریم نواز نے کہا کہ پیپلز پارٹی کے چیئرمین نے کہا تھا کہ ریاست نے فیصلہ کر لیا ہے کہ مسلم لیگ (ن) کامیاب ہوگی، تاہم وہ بلاول بھٹو سے کہنا چاہتی ہیں کہ انتخابات کا فیصلہ ریاست نہیں بلکہ عوام کرتے ہیں۔
انہوں نے کہا کہ جب گلگت بلتستان میں پیپلز پارٹی کامیاب ہوئی تو مسلم لیگ (ن) نے کھلے دل سے اپنی شکست تسلیم کی، لیکن آزاد کشمیر میں مسلم لیگ (ن) کی کامیابی کے بعد بلاول بھٹو زرداری نے دھاندلی کا الزام لگا دیا۔
مریم نواز نے کہا کہ عوامی فیصلے کو تسلیم کرنا جمہوری عمل کا حصہ ہے اور تمام سیاسی جماعتوں کو عوام کے مینڈیٹ کا احترام کرنا چاہیے۔
انہوں نے کہا کہ وہ انتخابی مہم کے لیے مظفرآباد اور میرپور گئیں، آزاد کشمیر میں پیپلز پارٹی کے جلسے بھی لوگوں نے دیکھے اور مسلم لیگ ن کے جلسوں کو بھی دنیا نے دیکھا، پیپلز پارٹی کے جلسے بھی خالی تھے، عوام نے شرکت نہیں کی۔
یہ بھی پڑھیں: مریم نواز کی ہدایت پر پنجاب سے 15 ’کلینک آن ویلز‘ آزاد کشمیر روانہ
ان کا کہنا تھا کہ بلاول بھٹو زرداری کو اپنے بیانیے پر محنت کرنی چاہیے، ان کے پاس آزاد کشمیر کے عوام کے لیے کوئی پروگرام نہیں تھا، نہ ان کے پاس کوئی اصلاحاتی ایجنڈا تھا اور نہ ہی ان کے پاس لوگوں کو دکھانے کے لیے کوئی کارکردگی تھی۔
مریم نواز نے کہا کہ سندھ میں گزشتہ 17 سال سے مسلسل ایک جماعت کی حکومت ہے، اس کے باوجود سندھ کا کوئی پروجیکٹ عوام کو دکھانے کے لیے نہیں تھا، آزاد کشمیر میں جہاں بھی میں گئی ایک ہی بات ہوئی کہ ہمیں پنجاب والی سہولیات چاہییں، آزاد کشمیر کے عوام ٹوٹی ہوئی سڑکوں اور ناکافی صحت کی سہولیات سے نجات چاہتے ہیں۔
انہوں نے کہا کہ آج کے دور میں صرف الزامات اور رونے دھونے سے کچھ حاصل نہیں ہوگا، یہ آرٹیفیشل انٹیلی جنس کا دور ہے جہاں حقائق اور کارکردگی سب کے سامنے آجاتی ہے۔
وزیراعلیٰ پنجاب کا کہنا تھا کہ بلاول بھٹو زرداری نے اپنی انتخابی مہم کے دوران سینئر سیاسی قیادت کو تنقید کا نشانہ بنایا، لیکن ووٹرز سمجھ چکے تھے کہ ان کے پاس عوام کے سامنے پیش کرنے کے لیے کوئی نمایاں کارکردگی موجود نہیں۔
یہ بھی پڑھیں: لاہور میں ’مریم نواز اسپورٹس سٹی‘ کے منصوبے میں پیشرفت، عالمی معیار کی سہولیات ایک ہی مقام پر
مریم نواز نے کہا کہ عوام نے کسان کارڈ، پکی سڑکوں اور ترقیاتی منصوبوں کے حق میں ووٹ دیا ہے، ان کے بقول بلاول بھٹو یہ بھول گئے کہ گزشتہ ایک سال سے آزاد کشمیر میں پیپلز پارٹی کی حکومت قائم ہے، اس کے باوجود انہوں نے وفاقی حکومت پر الزامات عائد کیے۔
انہوں نے کہا کہ جب کارکردگی نہ ہو تو دھاندلی کے الزامات لگانا آسان ہوتا ہے، جب کہ پیپلز پارٹی کے امیدواروں کی مبینہ دھاندلی کی ویڈیوز بھی سوشل میڈیا پر وائرل ہیں، جمہوریت میں عوام کے ووٹ اور فیصلے کو کھلے دل سے تسلیم کرنا چاہیے۔
