گورنر سندھ نہال ہاشمی نے کہا ہے کہ وزیراعظم شہباز شریف اور فیلڈ مارشل سید عاصم منیر کی قیادت میں پاکستان کا دفاع ناقابل تسخیر ہو چکا ہے اور آج کوئی بھی پاکستان کی طرف میلی آنکھ سے دیکھنے کی جرات نہیں کر سکتا۔
گورنر ہاؤس میں لیڈرشپ اینڈ آئی ٹی کلاسز کے طلبہ سے خطاب کرتے ہوئے انہوں نے کہاکہ ملکی سلامتی پر پوری قوم کو اپنی مسلح افواج پر فخر ہے، جنہوں نے ہر مشکل گھڑی میں وطن کے دفاع کو یقینی بنایا۔
گورنر سندھ نہال ہاشمی نے کہاکہ پاکستان کا دفاع مضبوط ہاتھوں میں ہے اور قومی یکجہتی، پیشہ ورانہ صلاحیتوں اور عوام کے اعتماد نے ملک کے دفاع کو مزید مستحکم بنایا ہے۔
انہوں نے کہا کہ آج پاکستان اپنی دفاعی صلاحیت، نوجوان نسل کے عزم اور قومی اتحاد کی بدولت پہلے سے زیادہ مضبوط نظر آتا ہے۔
انہوں نے نوجوانوں سے کہاکہ مضبوط دفاع صرف جدید ہتھیاروں سے نہیں بلکہ تعلیم یافتہ، باصلاحیت اور ٹیکنالوجی سے آراستہ نوجوانوں سے بھی ممکن ہوتا ہے۔ اسی مقصد کے لیے وزیراعظم کا ڈیجیٹل یوتھ پروگرام نوجوانوں کو نئے مواقع فراہم کررہا ہے تاکہ وہ جدید مہارتیں سیکھ کر ملک کی ترقی میں اپنا کردار ادا کر سکیں۔
گورنر سندھ نے اپنی سیاسی جدوجہد کا حوالہ دیتے ہوئے کہاکہ تین دہائیوں کی مسلسل محنت کے بعد انہیں پارلیمانی لیڈر بننے کا موقع ملا، جس سے یہ ثابت ہوتا ہے کہ مستقل مزاجی اور محنت کبھی رائیگاں نہیں جاتی۔
انہوں نے طلبہ پر زور دیا کہ وہ کامیابی کے لیے صبر، محنت اور دیانت کو اپنا شعار بنائیں۔
انہوں نے یوتھ پارلیمنٹ فورم کے چیئرمین رضوان جعفر اور آئی ٹی ٹرینر دانیال ناگوری کی خدمات کو بھی سراہا اور کہاکہ نوجوانوں کو جدید ٹیکنالوجی کی تعلیم دینا دراصل پاکستان کے مستقبل کو مضبوط بنانا ہے۔
اس موقع پر پرائم منسٹر یوتھ پروگرام کے کوآرڈینیٹر فہد شفیق نے بتایا کہ پروگرام کے تحت گزشتہ 3 ماہ میں 33 جامعات کے طلبہ میں 20 ہزار لیپ ٹاپ تقسیم کیے جا چکے ہیں، جبکہ نوجوانوں کے لیے 75 لاکھ روپے تک کے کاروباری قرضے، ٹیکنیکل اور ووکیشنل کورسز اور انوویشن پروگرام کے تحت 20 لاکھ روپے تک کی مالی معاونت بھی فراہم کی جارہی ہے۔
تقریب کے اختتام پر گورنر سندھ نے نوجوانوں پر زور دیا کہ وہ علم، ٹیکنالوجی، قومی یکجہتی اور وطن سے محبت کو اپنی زندگی کا حصہ بنائیں تاکہ پاکستان ترقی، استحکام اور خوشحالی کی راہ پر مزید آگے بڑھ سکے۔
