سام سنگ کے گلیکسی ایس 25 الٹرا اور ایس 24 الٹرا استعمال کرنے والے متعدد صارفین نے تازہ ترین سافٹ ویئر اپ ڈیٹ کے بعد بیٹری تیزی سے ختم ہونے، فون کے غیر معمولی حد تک گرم ہونے اور چارجنگ کی رفتار سست پڑنے کی شکایات کی ہیں۔
عوامی ٹیکنالوجی فورمز پر صارفین کی جانب سے کی جانے والی پوسٹس کے مطابق، اپ ڈیٹ انسٹال کرنے کے بعد فون کی بیٹری پہلے کے مقابلے میں کہیں زیادہ تیزی سے ختم ہورہی ہے۔
یہ بھی پڑھیں: گیلیکسی ایس 27 الٹرا میں صارفین کی سب سے بڑی خواہش سامنے آگئی، بیٹری میں اضافہ اولین مطالبہ
کئی صارفین کا کہنا ہے کہ مکمل چارج کیا گیا فون معمولی استعمال کے باوجود چند ہی گھنٹوں میں نمایاں حد تک بیٹری کھو دیتا ہے۔
صارفین کے مطابق تازہ اپ ڈیٹ کے بعد فون معمول سے زیادہ گرم بھی ہو رہے ہیں۔ بعض افراد نے بتایا کہ استعمال نہ ہونے کے باوجود میز یا صوفے پر رکھا فون بھی گرم محسوس ہوتا ہے۔
ان شکایات کے باعث اپ ڈیٹ کے مجموعی کارکردگی اور بیٹری کی عمر پر اثرات کے حوالے سے خدشات پیدا ہو گئے ہیں۔ کچھ صارفین نے یہ بھی بتایا کہ اپ ڈیٹ کے بعد فون پہلے کے مقابلے میں زیادہ وقت لے کر چارج ہورہا ہے۔
View this post on Instagram
رپورٹس کے مطابق اس مسئلے کی ممکنہ وجہ وہ پس منظر کے عمل ہو سکتے ہیں جو سافٹ ویئر اپ ڈیٹ کے بعد مسلسل چلتے رہتے ہیں۔ ان مسلسل چلنے والے عمل کی وجہ سے فون کا پروسیسر متحرک رہتا ہے، جس سے بجلی کا زیادہ استعمال ہوتا ہے اور حرارت بھی بڑھ جاتی ہے۔
یہ بھی پڑھیں: سام سنگ کا پہلا ملٹی فولڈنگ اسمارٹ فون متعارف، قیمت کتنی ہے؟
اگرچہ جنوبی کوریا کی کمپنی سام سنگ نے تاحال اس مسئلے پر کوئی باضابطہ بیان جاری نہیں کیا اور نہ ہی کوئی اصلاحی اپ ڈیٹ فراہم کی ہے، تاہم متاثرہ صارفین چند عارضی اقدامات سے اس کے اثرات کم کرسکتے ہیں۔
صارفین کو مشورہ دیا گیا ہے کہ ترتیبات میں جا کر بیٹری کے استعمال کا جائزہ لیں تاکہ زیادہ توانائی استعمال کرنے والی ایپس کی نشاندہی ہو سکے۔ ایسی ایپس کو بند کرنا، ان کا عارضی ذخیرہ صاف کرنا یا خودکار کلاؤڈ بیک اپ کو وقتی طور پر بند کرنا بیٹری کی کارکردگی بہتر بنانے میں مددگار ثابت ہوسکتا ہے۔
ماہرین کے مطابق فون کو دوبارہ شروع کرنے سے بھی بعض اوقات پس منظر میں مسلسل چلنے والے عمل رک جاتے ہیں اور مسئلہ وقتی طور پر حل ہوجاتا ہے۔
اس سے قبل بھی سام سنگ کی بعض سافٹ ویئر اپ ڈیٹس کے بعد اسی نوعیت کے مسائل سامنے آ چکے ہیں، جنہیں بعد میں جاری کیے گئے اصلاحی اپ ڈیٹس کے ذریعے حل کردیا گیا تھا۔
یہ بھی پڑھیں: سام سنگ نے ایپل کو ٹکر دینے کے لیے نیا ہیڈسیٹ لانچ کردیا، خصوصیات کیا ہیں؟
جب تک سام سنگ کی جانب سے باضابطہ اصلاحی اپ ڈیٹ جاری نہیں کی جاتی، گلیکسی ایس 25 الٹرا اور ایس 24 الٹرا کے متاثرہ صارفین کو انہی عارضی اقدامات پر انحصار کرنا پڑسکتا ہے تاکہ بیٹری کی کارکردگی بہتر رہے اور فون کم گرم ہو۔
