امریکی ٹیکنالوجی کمپنی ایپل نے کہا ہے کہ ستمبر میں ختم ہونے والی موجودہ سہ ماہی کے دوران اس کی آمدنی میں سالانہ بنیاد پر 9 سے 11 فیصد اضافہ متوقع ہے، جبکہ وال اسٹریٹ کے تجزیہ کار تقریباً 12 فیصد اضافے کی پیشگوئی کر رہے تھے۔ کمپنی کا کہنا ہے کہ فروخت میں سست روی کی وجہ مصنوعات کی طلب میں کمی نہیں بلکہ سپلائی چین میں رکاوٹیں اور جدید چپس و میموری کی محدود دستیابی ہے۔
ایپل کے چیف ایگزیکٹو آفیسر ٹم کک نے سرمایہ کاروں سے گفتگو میں کہا کہ کمپنی اس وقت سپلائی کے شدید دباؤ کا سامنا کر رہی ہے اور میموری چپس کے متبادل سپلائرز تلاش کرنے سمیت تمام ممکنہ آپشنز کا جائزہ لیا جا رہا ہے۔ ان کے مطابق جدید چپ سازی کی محدود صلاحیت ایپل کی مصنوعات کی بڑھتی ہوئی طلب پوری کرنے میں سب سے بڑی رکاوٹ بن گئی ہے۔
یہ بھی پڑھیے کیا ایپل آئی فون ایئر 2 بڑا سرپرائز دینے جارہا ہے؟ لانچ اور نئے فیچرز سے متعلق اہم تفصیلات
کمپنی نے مالی سال کی تیسری سہ ماہی کے نتائج بھی جاری کیے، جن کے مطابق 27 جون کو ختم ہونے والی سہ ماہی میں ایپل کی آمدنی 16.4 فیصد اضافے کے ساتھ 109.42 ارب ڈالر تک پہنچ گئی، جو مارکیٹ کی توقعات سے بہتر رہی۔ فی حصص آمدنی 2.02 ڈالر ریکارڈ کی گئی، جبکہ حکومتی ٹیرف ریفنڈ کو نکالنے کے بعد بھی منافع تجزیہ کاروں کے اندازوں سے زیادہ رہا۔
اس مضبوط کارکردگی میں سب سے اہم کردار آئی فون کی فروخت نے ادا کیا، جو 21.7 فیصد اضافے کے ساتھ 54.25 ارب ڈالر تک پہنچ گئی۔ یہ مالی سال کی تیسری سہ ماہی میں آئی فون کی اب تک کی سب سے زیادہ فروخت ہے۔
دوسری جانب میک کمپیوٹرز کی فروخت تقریباً 29 فیصد بڑھ کر 10.35 ارب ڈالر رہی، جبکہ آئی پیڈ کی فروخت 5.9 فیصد کمی کے ساتھ 6.19 ارب ڈالر تک محدود رہی۔
یہ بھی پڑھیے ایپل کے ستمبر ایونٹ میں آئی فون 18 پرو اور آئی فون الٹرا متعارف کرائے جانے کا امکان
ایپل کے سروسز شعبے، جس میں ایپ اسٹور، آئی کلاؤڈ اور دیگر ڈیجیٹل خدمات شامل ہیں، کی آمدنی 12.1 فیصد اضافے کے باوجود 30.74 ارب ڈالر رہی، جو مارکیٹ کی توقعات سے کم ثابت ہوئی۔ کمپنی کے مطابق موبائل گیمنگ کی کمزور کارکردگی اور بعض ممالک میں ایپ اسٹور کے کاروباری ماڈل میں تبدیلیوں نے اس شعبے کی آمدنی پر دباؤ ڈالا۔
ٹم کک نے یہ بھی بتایا کہ ایپل مستقبل میں اپنی مصنوعی ذہانت (AI) پر مبنی نئی سہولتوں کو iCloud+ کے ذریعے اضافی سبسکرپشن کے ساتھ پیش کرنے پر غور کر رہا ہے، تاکہ صارفین اپنی ضرورت کے مطابق مزید جدید فیچرز حاصل کر سکیں۔
