ٹیکنالوجی کمپنی ایپل کی جانب سے رواں سال ستمبر میں ہونے والے سالانہ ایونٹ میں آئی فون 18 سیریز متعارف کرانے کی تیاریاں جاری ہیں، جس میں آئی فون 18 پرو اور نئے آئی فون الٹرا کو نمایاں حیثیت حاصل ہونے کا امکان ہے۔
یہ بھی پڑھیں: دوران سفر متلی کی شکایت: ازالے کے لیے آئی فون کی ایک خفیہ سیٹنگ استعمال کرکے دیکھیں
رپورٹس کے مطابق ایپل ستمبر ایونٹ میں آئی فون 18 پرو اور بالکل نئے آئی فون الٹرا کے ساتھ دیگر مصنوعات، جن میں نئی گھڑیاں اور سافٹ ویئر اپ ڈیٹس شامل ہو سکتی ہیں، پیش کرے گا۔
تاہم ایپل نے ابھی تک ایونٹ کی باضابطہ تاریخ کا اعلان نہیں کیا۔ کمپنی کی گزشتہ لانچ روایات کو دیکھتے ہوئے امکان ہے کہ ایونٹ کا دعوت نامہ اگست کے آخری ہفتے میں جاری کیا جائے گا۔
View this post on Instagram
ٹیکنالوجی ماہرین کے مطابق اگر ایپل اپنے معمول کے شیڈول پر قائم رہتا ہے تو ایونٹ کے دعوت نامے 25 یا 26 اگست کو جاری کیے جا سکتے ہیں، جبکہ لانچ تقریب 9 ستمبر کو ہونے کا امکان ہے۔
یہ بھی پڑھیں: کیا ایپل آئی فون ایئر 2 بڑا سرپرائز دینے جارہا ہے؟ لانچ اور نئے فیچرز سے متعلق اہم تفصیلات
ایپل گزشتہ کئی برسوں سے اپنے نئے آئی فون ماڈلز کے اعلان اور لانچ ایونٹ کے درمیان تقریباً دو ہفتوں کا وقفہ رکھتا آیا ہے۔
گزشتہ برس آئی فون 17 کا اعلان 26 اگست 2025 کو کیا گیا تھا، جبکہ لانچ ایونٹ 9 ستمبر کو منعقد ہوا تھا۔ اسی طرح آئی فون 16 بھی 26 اگست 2024 کو متعارف کرایا گیا اور اس کی تقریب 9 ستمبر کو ہوئی تھی۔
آئی فون 15 اور آئی فون 14 کے اعلانات میں بھی تقریباً دو ہفتوں کا یہی فرق دیکھا گیا تھا، جبکہ کورونا وبا کے باعث آئی فون 12 اور آئی فون 13 کی لانچنگ کے شیڈول میں تبدیلی آئی تھی۔
یہ بھی پڑھیں: ایپل نے فولڈ ایبل آئی فون کی لانچنگ کیوں مؤخر کی؟
رپورٹس کے مطابق آئی فون 18 پرو اور آئی فون الٹرا ایپل کے نئے ایونٹ کی سب سے بڑی توجہ کا مرکز ہوں گے، تاہم حتمی تفصیلات ایپل کی جانب سے باضابطہ اعلان کے بعد ہی سامنے آئیں گی۔
