پاکستانی کرکٹر عماد وسیم کی سابق اہلیہ ثانیہ اشفاق نے سوشل میڈیا پر دلہن کے روپ میں ایک ویڈیو شیئر کرکے مداحوں کی توجہ حاصل کرلی جس کے بعد ان کی نئی زندگی سے متعلق مختلف قیاس آرائیاں شروع ہوگئی ہیں۔
ثانیہ اشفاق نے اپنے انسٹاگرام اکاؤنٹ پر دلہن کے لباس میں ایک ویڈیو شیئر کی ہے جس میں وہ سرخ عروسی جوڑے اور کندن کے روایتی زیورات پہنے نظر آتی ہیں۔ ویڈیو میں وہ فون پر اپنے ساتھ موجود ایک شخص سے پوچھتی ہیں ’میں کیسی لگ رہی ہوں؟‘ جس پر جواب آتا ہے ’میری دلہن لگ رہی ہو‘۔
View this post on Instagram
ویڈیو کے ساتھ ثانیہ نے کیپشن میں لکھا ’زندگی کے ایک نئے باب کا آغاز، الحمدللہ‘۔ اس پوسٹ کے بعد سوشل میڈیا پر مداحوں کی جانب سے مبارکباد اور نیک خواہشات کا سلسلہ شروع ہوگیا۔ ایک صارف نے تبصرہ کرتے ہوئے لکھا بریک اپ کے بعد کسی خاتون کو خود کو سنبھالتے اور پہلے سے زیادہ پراعتماد دیکھ کر بہت خوشی ہوتی ہے۔
دوسری جانب متعدد صارفین کا کہنا ہے کہ یہ ویڈیو ضروری نہیں کہ نئی شادی کا اعلان ہو بلکہ ممکن ہے یہ ثانیہ اشفاق کے ماڈلنگ یا شوبز کیریئر کے کسی نئے منصوبے کی تشہیر ہو۔ تاہم خود ثانیہ اشفاق نے تاحال اس ویڈیو کی نوعیت یا اپنے ’نئے باب‘ کی وضاحت نہیں کی جس کے باعث مداح مختلف اندازے لگا رہے ہیں۔
یہ بھی پڑھیں: ’میری زندگی سے دور رہیں‘، نائلہ راجہ کی عماد وسیم کی سابقہ اہلیہ ثانیہ اشفاق کو آخری وارننگ
واضح رہے کہ ثانیہ اشفاق گزشتہ چند ماہ سے اپنی طلاق اور ذاتی زندگی سے متعلق بیانات کے باعث خبروں میں رہی ہیں۔ انہوں نے مختلف مواقع پر سابق شوہر پر متعدد الزامات عائد کیے جن میں حمل کے دوران انہیں اور بچوں کو تنہا چھوڑنے، دوسری خاتون کے ساتھ تعلق رکھنے، طلاق کے بعد جائیداد کے معاملات پر دباؤ ڈالنے اور ایک حالیہ ویڈیو میں اسقاطِ حمل پر مجبور کرنے جیسے دعوے شامل ہیں۔ ان الزامات پر عماد وسیم کی جانب سے عوامی سطح پر کوئی تفصیلی ردِعمل سامنے نہیں آیا۔
