معروف پاکستانی اداکار فیصل قریشی نے کہا ہے کہ پاکستانی ڈرامے عالمی معیار پر نیٹ فلکس جیسے بڑے پلیٹ فارمز کا مقابلہ کرنے کی صلاحیت رکھتے ہیں، تاہم انہوں نے غیر ملکی مواد پر ٹیکس میں کمی کی تجویز پر تحفظات کا اظہار کیا ہے۔
یہ بھی پڑھیں: نیٹ فلیکس کے مقابلے میں پی ٹی وی فلیکس: وفاقی وزیر اطلاعات مریم اورنگزیب نے افتتاح کر دیا
فیصل قریشی کے مطابق پاکستانی ڈراموں نے عالمی سطح پر اپنی پہچان بنائی ہے اور انہیں بھارت، بنگلہ دیش، نیپال، آذربائیجان اور ترکی سمیت کئی ممالک میں پسند کیا جاتا ہے۔ ان کا کہنا تھا کہ جب مقامی مواد کو ناظرین کی پذیرائی حاصل ہے تو غیر ملکی مواد کو فروغ دینے کی ضرورت پر غور ہونا چاہیے۔
اداکار نے خبردار کیا کہ غیر ملکی ٹی وی شوز اور اشتہارات پر ٹیکس میں نرمی سے پاکستان کی مقامی تفریحی صنعت متاثر ہو سکتی ہے۔ ان کا کہنا تھا کہ ایک ڈرامہ پروجیکٹ سے اداکاروں کے علاوہ لکھاری، ہدایت کار، تکنیکی عملہ اور دیگر کئی افراد وابستہ ہوتے ہیں، اس لیے مقامی صنعت کا تحفظ ضروری ہے۔
فیصل قریشی نے کہا کہ ماضی میں غیر ملکی مواد کی وجہ سے ڈبنگ سے وابستہ افراد کو روزگار ملتا تھا، لیکن مصنوعی ذہانت کے بڑھتے استعمال کے باعث یہ مواقع بھی کم ہورہے ہیں۔
یہ بھی پڑھیں: نیٹ فلکس پر پاکستانی مواد نہ ہونے کی اصل وجہ کیا ہے؟ فیصل قریشی نے سب کچھ بتا دیا
انہوں نے حکومت سے اپیل کی کہ وہ پاکستانی فلم اور ڈرامہ صنعت کی ترقی کے لیے ایسی پالیسیاں بنائے جن سے مقامی فنکاروں اور دیگر شعبوں سے وابستہ افراد کو روزگار کے بہتر مواقع مل سکیں۔
واضح رہے کہ پاکستانی مواد کو عالمی اسٹریمنگ پلیٹ فارمز تک رسائی کے معاملے پر شوبز حلقوں میں بحث جاری ہے، جہاں بعض فنکاروں نے عالمی معیار کی پروڈکشن اور بہتر تقسیم کے نظام کی ضرورت پر بھی زور دیا ہے۔
