بالی ووڈ کے سینئر اداکار پردیپ راوت جو فلم ’گجنی‘ میں ولن کے کردار سے شہرت حاصل کرنے کے علاوہ ہندی، تیلگو اور تامل سینما میں اپنی منفرد اداکاری کے لیے جانے جاتے تھے 74 برس کی عمر میں انتقال کر گئے۔
بھارتی میڈیا کے مطابق پردیپ راوت منگل کی شام ممبئی میں خون کے کینسر کے باعث انتقال کر گئے۔ ان کے منیجر سدھارتھ آر تیواری نے بتایا کہ اداکار گزشتہ ایک ماہ سے ممبئی کے کوکیلابین دھیروبھائی امبانی اسپتال میں زیر علاج تھے تاہم بعد ازاں انہیں بھیونڈی کے ایک کینسر اسپتال منتقل کیا گیا جہاں وہ زندگی کی جنگ ہار گئے۔
یہ بھی پڑھیں: بالی ووڈ اسٹار سدھارتھ ملہوترا کے والد انتقال کر گئے، اداکار نے سوشل میڈیا پر جذباتی پیغام شیئر کردیا
پردیپ راوت کے انتقال کی خبر سامنے آتے ہی بھارتی شوبز شخصیات اور مداحوں نے گہرے رنج و غم کا اظہار کرتے ہوئے انہیں خراجِ عقیدت پیش کیا۔
فلم ’لگان‘ میں ان کے ساتھی اداکار یش پال شرما نے سوشل میڈیا پر تعزیتی پیغام میں لکھا کہ ’پردیپ راوت، ہمارے ’لگان‘ کے گجنی دیوا، آپ کی روح کو سکون ملے‘۔
یہ بھی پڑھیں: بالی ووڈ کے لیجنڈری اداکار دھرمیندر انتقال کرگئے
اداکار گجیندر چوہان نے بھی افسوس کا اظہار کرتے ہوئے کہا ’اوم شانتی، اوم شانتی۔ ہمارے دوست اور ساتھی پردیپ راوت، جنہوں نے ‘مہابھارت’ میں اشوتھاما کا کردار ادا کیا، ہم سے بچھڑ گئے‘۔
پردیپ راوت بھارتی فلم انڈسٹری کے ان اداکاروں میں شمار ہوتے تھے جنہوں نے ہندی، تیلگو اور تامل فلموں میں متعدد یادگار کردار ادا کیے۔ ان کی نمایاں فلموں میں ’سرفروش‘، ’لگان‘، ’سائے‘، ’نائیک‘ اور ’گجنی‘ شامل ہیں جبکہ ان کی آخری فلم ’چھاوا‘ تھی جس میں انہوں نے اداکار وکی کوشل کے ساتھ یساجی کانک کا کردار نبھایا تھا۔
