گوگل کے چیف سائنسدان اور کمپنی کے 30ویں ملازم جیف ڈین نے تقریباً 27 سال بعد گوگل سے علیحدگی اختیار کرتے ہوئے مصنوعی ذہانت (اے آئی) کے شعبے میں اپنی نئی کمپنی قائم کرنے کا اعلان کر دیا۔
جیف ڈین نے سوشل میڈیا پلیٹ فارم ایکس پر جاری بیان میں کہا کہ وہ گوگل میں اپنے طویل سفر کا اختتام کرتے ہوئے سنجے گھیموات، اوریول ونیالس اور کوک لے کے ساتھ مل کر ڈسکوری لوپ (Discovery Loop) کے نام سے ایک نئی اے آئی کمپنی شروع کر رہے ہیں۔
Tomorrow will be my last day at Google after 27 years, and watching it grow from 25 people to 190,000+ has been an amazing journey. Below is a note I shared with many people internally at Google today. An excerpt is:
It has been an absolute pleasure to work with you and to help… pic.twitter.com/o3aRNLkssA
— Jeff Dean (@JeffDean) August 5, 2026
انہوں نے بتایا کہ ڈسکوری لوپ ایک پبلک بینیفٹ کارپوریشن ہوگی جس کا مقصد مشین لرننگ، سائنس اور انجینئرنگ کے شعبوں میں خودکار نظام متعارف کرا کے نئی دریافتوں اور سائنسی ترقی کو تیز کرنا ہے۔
جیف ڈین نے اپنے پیغام میں کہا کہ انہوں نے گوگل کو صرف 25 ملازمین والی کمپنی سے بڑھ کر تقریباً ایک لاکھ 90 ہزار ملازمین پر مشتمل عالمی ٹیکنالوجی ادارہ بنتے دیکھا۔ انہوں نے اپنے ساتھیوں کا شکریہ ادا کرتے ہوئے کہا کہ دنیا کی چند سب سے زیادہ استعمال ہونے والی اور مؤثر مصنوعات کی تیاری میں کردار ادا کرنا ان کے لیے اعزاز کی بات رہی۔
یہ بھی پڑھیں: گوگل مفت سروسز دے کر بھی ہر منٹ میں لاکھوں ڈالر کیسے کماتا ہے؟
دوسری جانب گوگل کے چیف ایگزیکٹو آفیسر سندر پچائی نے اعلان کیا کہ گوگل ڈسکوری لوپ میں بانی سرمایہ کار (Founding Investor) کے طور پر شامل ہوگا۔ انہوں نے جیف ڈین اور ان کے شریک بانی سنجے گھیموات کے لیے نیک خواہشات کا اظہار کرتے ہوئے ان کی خدمات کو سراہا۔
جیف ڈین 1999 میں گوگل میں اس وقت شامل ہوئے تھے جب کمپنی میں صرف 30 ملازمین تھے۔ اپنے تقریباً تین دہائیوں پر محیط کیریئر کے دوران انہوں نے گوگل سرچ کے بنیادی انفراسٹرکچر، ویب کرالنگ، انڈیکسنگ، سرچ سسٹمز اور بعد ازاں جیمنی (Gemini) سمیت گوگل کی جدید مصنوعی ذہانت کی ٹیکنالوجیز کی ترقی میں کلیدی کردار ادا کیا۔
یہ بھی پڑھیں: گوگل نے لانچ سے پہلے ہی اے آئی سٹوڈیو موبائل ایپ کیوں منسوخ کی؟
جیف ڈین کی رخصتی گوگل میں اعلیٰ سطح کی انتظامی تبدیلیوں کے دوران سامنے آئی ہے۔ ان تبدیلیوں کے تحت گوگل ڈیپ مائنڈ کے سربراہ ڈیمس ہسابس چیئرمین کا عہدہ سنبھالیں گے جبکہ چیف ٹیکنالوجی آفیسر کورائے کاوکچو اوغلو کو سینئر نائب صدر مقرر کیا جا رہا ہے جو جیمنی ماڈلز اور دیگر اے آئی منصوبوں کی نگرانی کریں گے۔
یہ پیش رفت ایسے وقت میں ہوئی ہے جب گوگل کو مصنوعی ذہانت کے شعبے میں ماہرین کی رخصتی کا سامنا ہے۔ حالیہ مہینوں میں متعدد ممتاز اے آئی محققین دیگر بڑی کمپنیوں میں شامل ہو چکے ہیں جبکہ گوگل کو اوپن اے آئی، مائیکروسافٹ، اینتھروپک، میٹا اور چین کی کمپنیوں ڈیپ سیک اور مون شاٹ سے سخت مسابقت کا سامنا ہے۔
