وزیراعظم محمد شہباز شریف نے اپنے سرکاری وفد کے ہمراہ مکہ مکرمہ میں عمرہ ادا کیا اور پاکستان کی ترقی و خوشحالی، امتِ مسلمہ کے اتحاد، خطے اور دنیا میں امن و استحکام کے لیے خصوصی دعائیں کیں۔
سعودی پریس ایجنسی کے مطابق وزیراعظم محمد شہباز شریف نے جمعہ کو مکہ مکرمہ پہنچ کر عمرہ کے مناسک ادا کیے۔ مسجد الحرام آمد پر مکہ مکرمہ کے حکام نے ان کا استقبال کیا۔
Prime Minister Muhammad Shehbaz Sharif, Deputy Prime Minister Senator Mohammed Ishaq Dar, Chief of Army Staff & Chief of Defence Forces Field Marshal Syed Asim Munir, Federal Ministers Khawaja Muhammad Asif, Attaullah Tarar and Pakistani delegation performed Umrah. Makkah, 7… pic.twitter.com/A8b9K9R5uT
— Prime Minister's Office (@PakPMO) August 7, 2026
دریں اثنا وزیراعظم آفس پاکستان کے ’ایکس‘ اکاؤنٹ کے مطابق وزیراعظم کے ہمراہ نائب وزیراعظم و وزیر خارجہ سینیٹر محمد اسحاق ڈار، چیف آف ڈیفنس فورسز فیلڈ مارشل سید عاصم منیر، وفاقی وزرا خواجہ محمد آصف اور عطا اللہ تارڑ، وزیراعظم کے معاون خصوصی طارق فاطمی اور دیگر ارکانِ پاکستانی وفد نے بھی عمرہ کی سعادت حاصل کی۔
وزیراعظم آفس کے مطابق عمرہ کی ادائیگی سے قبل پاکستانی وفد کو خانہ کعبہ کے اندر حاضری کی خصوصی سعادت بھی حاصل ہوئی۔ عمرہ کی ادائیگی کے بعد وزیراعظم شہباز شریف، فیلڈ مارشل سید عاصم منیر اور وفد کے دیگر ارکان نے پاکستان کی سلامتی، ترقی، خوشحالی، امتِ مسلمہ کے اتحاد و فلاح اور خطے سمیت پوری دنیا میں امن و استحکام کے لیے خصوصی دعائیں کیں۔
یہ بھی پڑھیں:وزیراعظم شہباز شریف جدہ پہنچ گئے، کنگ عبدالعزیز انٹرنیشنل ایئر پورٹ پر پرتپاک استقبال
اس سے قبل جدہ پہنچنے پر مکہ ریجن کے نائب گورنر شہزادہ سعود بن مشعل بن عبدالعزیز اور سعودی وزیر ماحولیات، پانی و زراعت انجینئر عبدالرحمن بن عبدالمحسن الفضلی نے وزیراعظم شہباز شریف اور پاکستانی وفد کا خیرمقدم کیا۔
وزیراعظم کا یہ دورہ سعودی عرب دونوں برادر ممالک کے درمیان اعلیٰ سطحی روابط کے تسلسل کا حصہ ہے، جس کے دوران سعودی قیادت کے ساتھ ملاقاتوں میں پاک۔سعودیہ تعلقات، دوطرفہ تعاون، سرمایہ کاری، علاقائی صورتحال، فلسطین، مشرقِ وسطیٰ اور دیگر اہم عالمی و علاقائی امور پر تبادلہ خیال بھی متوقع ہے۔
