وزیر تعلیم پنجاب رانا سکندر حیات نے اعلان کیا ہے کہ آئندہ سال سے پنجاب کے تعلیمی بورڈز میں امتحانی پرچوں کی مینول چیکنگ مکمل طور پر ختم کر دی جائے گی اور اس کی جگہ جدید ای مارکنگ (Screen Marking) نظام نافذ کیا جائے گا۔ اس کے ساتھ مکمل آن لائن ری چیکنگ، شفاف عملی امتحانی جانچ اور تربیت یافتہ نگران عملے کے ذریعے امتحانی نظام کو عالمی معیار کے مطابق بنایا جائے گا۔
نتائج کے اعلان اور تقریبِ تقسیمِ انعامات سے خطاب کرتے ہوئے رانا سکندر حیات نے کہا کہ حکومت پنجاب تعلیمی بورڈز کو مکمل طور پر ڈیجیٹلائز کرنے کی جانب تیزی سے گامزن ہے۔ انہوں نے کہا کہ آئندہ سال سے تمام امتحانی پرچے اسکرین مارکنگ کے ذریعے چیک کیے جائیں گے جبکہ سنٹرلائزڈ چیکنگ کے نظام کو بھی مزید مؤثر اور شفاف بنایا جا رہا ہے۔
From next year e-marking, complete online rechecking, transparent practical assessments & trained invigilation will raise the system to global standards. Every child will have access to the same quality, opportunity & merit. pic.twitter.com/4J3QeeWGX3
— Rana Sikandar Hayat (@RanaSikandarH) August 6, 2026
انہوں نے بتایا کہ طلبہ کو کیو آر کوڈ کے ذریعے اپنے امتحانی پرچوں کی آن لائن ری چیکنگ کی سہولت بھی فراہم کی جائے گی جس سے نتائج کے نظام میں شفافیت اور اعتماد میں مزید اضافہ ہوگا۔
وزیر تعلیم نے کہا کہ امتحانی نظام میں نقل کے خلاف سخت اقدامات کے نتیجے میں بوٹی مافیا کا 95 فیصد خاتمہ کر دیا گیا ہے۔ ان کے مطابق رواں سال کسی بھی سطح پر یہ شکایت سامنے نہیں آئی کہ امتحانی مراکز فروخت کیے گئے یا کسی سے پرچہ حل کروانے کے لیے رقم وصول کی گئی۔
یہ بھی پڑھیں: پنجاب میں اسکول میل پروگرام کے تحت 90 ہزار بچے اسکول آئے، صوبائی وزیر تعلیم رانا سکندر حیات
رانا سکندر حیات نے کہا کہ اس سال نتائج کی تیاری میں جدید ٹیکنالوجی متعارف کرائی گئی ہے۔ اب طلبہ کو ہارڈ کاپی کی بجائے اپنے رزلٹ کارڈ آن لائن دستیاب ہوں گے جبکہ نجی اسکولوں کے طلبہ بھی اپنے تعلیمی اداروں کے پورٹل سے تصدیق شدہ (Verified) رزلٹ کارڈ حاصل کر سکیں گے جنہیں الگ سے ویریفائی کروانے کی ضرورت نہیں ہوگی۔
انہوں نے مزید بتایا کہ طلبہ کی سہولت کے لیے اے آئی چیٹ بورڈ بھی متعارف کرا دیا گیا ہے جہاں وہ امتحانات اور نتائج سے متعلق مطلوبہ معلومات فوری حاصل کر سکیں گے جس کے بعد انہیں معمولی معلومات کے لیے بورڈ دفاتر کے چکر نہیں لگانے پڑیں گے۔
یہ بھی پڑھیں: بوٹی مافیا میں بڑے ادارے ملوث ہیں: وزیر تعلیم پنجاب رانا سکندر
وزیر تعلیم نے کہا کہ حکومت کا مقصد ہر بچے کو یکساں معیارِ تعلیم، مساوی مواقع اور میرٹ کی بنیاد پر آگے بڑھنے کے یکساں مواقع فراہم کرنا ہے۔ انہوں نے مزید کہا کہ سرکاری جامعات میں طلبہ کے داخلوں میں مسلسل اضافہ اس بات کا ثبوت ہے کہ پبلک سیکٹر کے تعلیمی اداروں پر طلبہ اور والدین کا اعتماد مضبوط ہو رہا ہے۔
