سوشل میڈیا پلیٹ فارم ٹک ٹاک پر تیار کی گئی ایک خفیہ داخلی رپورٹ میں انکشاف ہوا ہے کہ کمپنی نے 2021 میں لاکھوں صارفین کے لیے ایک اہم حفاظتی فیچر جان بوجھ کر فعال نہیں کیا تاکہ یہ جانچا جا سکے کہ اس کے بغیر صارفین پلیٹ فارم پر زیادہ وقت گزارتے ہیں یا نہیں۔
بلوم برگ کو موصول ہونے والی اس لیک رپورٹ کے مطابق ٹک ٹاک نے منفی اور ذہنی دباؤ پیدا کرنے والے مواد کے مسلسل دکھائے جانے سے صارفین کو بچانے کے لیے ایک نیا حفاظتی نظام متعارف کرایا تھا، تاہم امریکا میں تقریباً 10 فیصد صارفین، یعنی لگ بھگ ڈیڑھ کروڑ افراد، کو جان بوجھ کر پرانے الگورتھم پر رکھا گیا تاکہ صارفین کی سرگرمی اور پلیٹ فارم پر گزارے گئے وقت کا موازنہ کیا جا سکے۔
A confidential internal document shows TikTok withheld a safety feature from millions of users — including a teenager who died by suicide. https://t.co/XC2dL90SJg
— Businessweek (@BW) August 5, 2026
رپورٹ کے مطابق اسی گروپ میں شامل 16 سالہ امریکی نوجوان چیس ناسکا بھی تھا، جس کی ٹک ٹاک فیڈ اس کی وفات سے قبل ڈپریشن، تنہائی اور خودکشی سے متعلق ہزاروں ویڈیوز سے بھری ہوئی تھی۔ فروری 2022 میں اس نوجوان نے اپنی جان لے لی۔
ٹک ٹاک کی الگورتھم اور سیفٹی ٹیموں کی داخلی تحقیقات میں یہ بات سامنے آئی کہ اس نوجوان کے اکاؤنٹ پر حفاظتی فیچر کا فعال نہ ہونا کسی تکنیکی خرابی کا نتیجہ نہیں تھا بلکہ کمپنی کے تجرباتی منصوبے کا حصہ تھا۔
رپورٹ میں کہا گیا ہے کہ اس انکشاف کے بعد ٹک ٹاک کی جانب سے امریکی قانون سازوں کو دیے گئے بیانات پر بھی سوالات اٹھ گئے ہیں۔ داخلی تحقیقات مکمل ہونے کے چند ہفتوں بعد کمپنی کے چیف ایگزیکٹو شو زی چو نے کانگریس میں پیش ہو کر کہا تھا کہ نوجوان صارفین کی حفاظت اور شفافیت کمپنی کی اولین ترجیح ہے۔
یہ بھی پڑھیں:ٹک ٹاک صارفین کو ڈزنی کے مشہور کردار استعمال کرنے کی اجازت مل گئی
رپورٹ کے مطابق کانگریس کے تحریری سوالات کے جواب میں بھی کمپنی نے یہ ظاہر نہیں کیا تھا کہ لاکھوں صارفین ایک ایسے تجربے کا حصہ تھے جس میں حفاظتی اقدامات اور صارفین کی مصروفیت کے درمیان توازن کا جائزہ لیا جا رہا تھا۔
دوسری جانب ٹک ٹاک کا مؤقف ہے کہ صارفین کی حفاظت اس کی اولین ترجیح ہے، کمپنی اعتماد اور حفاظتی اقدامات پر مسلسل سرمایہ کاری کر رہی ہے، جبکہ رواں سال خودکشی سے متعلق کئی ذاتی نقصان کے مقدمات بھی طے کیے جا چکے ہیں۔
