پاکستان کے زرعی شعبے میں نیا انقلابی موڑ، پھلوں کا پہلا برآمد کنندہ اسٹاک ایکسچینج کی فہرست پر لسٹنگ کے لیے تیار

پاکستان کی روایتی مالیاتی مارکیٹ میں ایک تاریخی تبدیلی کی بنیاد رکھی جا رہی ہے۔ ملک میں تازہ پھلوں اور سبزیوں کا معروف ایکسپورٹر ایس ای فروٹس اینڈ ویجیٹیبل لمیٹڈ پاکستان اسٹاک ایکسچینج کی کمپنیز فہرست میں درج ہونے والا زرعی شعبے کا پہلا برآمد کنندہ بننے جا رہا ہے۔

یہ پیشرفت ایک ایسے وقت میں سامنے آئی ہے جب پاکستان اپنے زرعی برآمدات کو وسعت دے کر زرمبادلہ کے بحران سے نکلنے کی کوشش کر رہا ہے۔ اس ابتدائی پیشکش کو ملک کے زرعی اور مالیاتی دونوں شعبوں میں ایک اہم سنگِ میل قرار دیا جا رہا ہے۔

آئی پی او کی تفصیلات اور فنانشل ماڈل

مجوزہ آئی پی او کے دائرہ کار کے مطابق کمپنی اسٹاک مارکیٹ سے 1.2 ارب روپے سے 1.9 ارب روپے کا سرمایہ اکٹھا کرنے کا ارادہ رکھتی ہے۔

یہ بھی پڑھیں:شیئر بازار کی نئی اڑان، پاکستان اسٹاک ایکسچینج میں 100 انڈیکس 1 لاکھ 85 ہزار سے آگے

اس کمپنی کی جانب سے کل پیش کردہ شیئرز کی تعداد 3 کروڑ بتائی گئی ہے جبکہ اسکا پرائس بینڈ 40 روپے سے 64 روپے فی شیئر رکھا گیا ہے۔

ٹاپ لائن سیکیورٹیز اور گروتھ سیکیورٹیز

کمپنی انتظامیہ کے مطابق لسٹنگ سے حاصل ہونے والے سرمائے کو بنیادی طور پر آپریشنل اخراجات کو مستحکم کرنے، پروسیسنگ کی صلاحیت میں اضافے اور بین الاقوامی معیار کے مطابق پیداواری گنجائش بڑھانے، کولڈ چین انفراسٹرکچر کی جدید کاری، پھلوں کی تازگی برقرار رکھنے اور ضیاع کم کرنے کے لیے کولڈ اسٹوریج اور ٹرانسپورٹ کو بہتر بنانے، فصلوں کی بڑے پیمانے پر خریداری، عالمی منڈیوں میں پاکستان کے اسٹرس اور زرعی مصنوعات کی بڑھتی ہوئی مانگ کو پورا کرنے میں استعمال کیا جائے گا۔

سپلائی چین، اسٹرس بیلٹ اور بین الاقوامی منڈیاں

سرگودھا سے کام کرنے والی یہ کمپنی بنیادی طور پر 3 مصنوعات کینو، عام اور آلو کی پروسیسنگ اور برآمدات سے منسلک ہے۔ فی الوقت کمپنی مڈل ایسٹ (مشرقِ وسطیٰ)، سینٹرل ایشیا (وسطی ایشیا)، فار ایسٹ (مشرقِ بعید)، یورپ اور آسٹریلیا جیسے پریمیم مارکیٹوں میں اپنی مصنوعات برآمد کر رہی ہے۔

معاشی ماہر سلمان نقوی کے مطابق پاکستان میں زرعی اجناس کی برآمد میں سب سے بڑا چیلنج پوسٹ ہارویسٹ لاسز یا فصل اترنے کے بعد ہونے والا ضیاع اور کولڈ چین کا عدم وجود رہا ہے۔ اس آئی پی او کے ذریعے انفراسٹرکچر میں سرمایہ کاری کو اسی خامی کو دور کرنے کے لیے استعمال کیا جائے گا۔

مارکیٹ اسٹرکچر میں تبدیلی، روایتی اسٹاکس سے زرعی ایکویٹی کی طرف

اسٹاک مارکیٹ ایکسپرٹ شہریار بٹ کے مطابق پاکستان اسٹاک ایکسچینج (پی ایس ایکس) پر تاریخی طور پر بینکنگ و مالیاتی ادارے، توانائی اور مٹیریلز (سیمنٹ، کھاد) کا غلبہ رہا ہے۔ ایک پیور پلے ایگری کلچرل برآمد کنندہ کی آمد مارکیٹ کے بنیادی ڈھانچے کو تنوع فراہم کرے گی۔

ماہرین معیشت اور مالیاتی تجزیہ کاروں کی آرا

آئی پی او کے حوالے سے گفتگو کرتے ہوئے اسٹاک ایکسچینج ایکسپرٹ محمد جبران کا کہنا ہے کہ یہ لسٹنگ سرمایہ کاروں کو پاکستان کے بڑھتے ہوئے زرعی برآمدی شعبے میں براہِ راست حصہ لینے کا ایک نادر موقع فراہم کرتی ہے۔

یہ اقدام نہ صرف ویلیو ایڈیشن کو فروغ دے گا بلکہ ملکی برآمدات اور پائیدار اقتصادی ترقی میں بھی اہم کردار ادا کرے گا۔

ان کا کہنا ہے کہ پاکستان میں حالیہ برسوں کے دوران کاشتکاروں کی جانب سے پروسیسنگ، بہتر گریڈنگ اور عالمی معیار کی پیکنگ پر توجہ دی گئی ہے، جس کے اثرات اب مالیاتی منڈیوں پر بھی ظاہر ہو رہے ہیں۔

تاجر رہنما محمد ابراہیم کے مطابق پاکستان کا رواں اقتصادی بحران زرمبادلہ میں اضافے کا تقاضا کرتا ہے۔ ٹیکسٹائل پر حد سے زیادہ انحصار کے بجائے اگر زرعی مصنوعات کو کارپوریٹ شکل دی جائے اور انہی اسٹاک مارکیٹ سے کیپیٹل اکٹھا کرنے کی اجازت دی جائے، تو یہ پاکستان کے ایکسپورٹ ماڈل کے لیے ایک گیم چینجر ثابت ہو سکتا ہے۔

مستقبل کا منظرنامہ

ایس ای فروٹس اینڈ ویجیٹیبل لمیٹڈ کی پاکستان اسٹاک ایکسچینج پر آمد دیگر زرعی اور فوڈ پروسیسنگ کمپنیوں کے لیے بھی راستے کھولے گی۔

اگر یہ آئی پی او کامیا ب رہتا ہے، تو توقع ہے کہ دیگر علاقائی برآمد کنندگان بھی نجی سرمائے سے نکل کر پبلک مارکیٹ سے ایکویٹی حاصل کرنے کی طرف گامزن ہوں گے، جس سے پاکستان کے زرعی سیکٹر میں شفافیت اور جدید ٹیکنالوجی کے استعمال کو مزید فروغ ملے گا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں