پاکستان اسٹاک ایکسچینج میں منگل کے روز کاروباری سرگرمیوں کے آغاز پر مثبت رجحان ریکارڈ کیا گیا، جہاں انڈیکس میں تقریباً 500 پوائنٹس کا اضافہ ریکارڈ کیا گیا۔
صبح 9:45 بجے کے قریب بینچ مارک کے ایس ای 100 انڈیکس 178,970.18 پوائنٹس کی سطح پر ٹریڈ کر رہا تھا، جو 498.32 پوائنٹس یعنی 0.28 فیصد اضافہ ظاہر کرتا ہے۔
یہ بھی پڑھیں: ایران امریکا مذاکرات میں پیشرفت، اسٹاک مارکیٹ میں 500 سے زائد پوائنٹس کا اضافہ
مارکیٹ میں سیمنٹ، کمرشل بینکس، تیل و گیس کی تلاش کرنے والی کمپنیوں، آئل مارکیٹنگ کمپنیز اور پاور جنریشن کے شعبوں میں خریداری کا رجحان غالب رہا۔
حبکو، او جی ڈی سی ایل، پاکستان آئل فیلڈز، پاکستان پیٹرولیم لمیٹڈ، پاکستان اسٹیٹ آئل، حبیب بینک، مسلم کمرشل بینک اور یونائیٹڈ بینک جیسے بڑے انڈیکس شیئرز مثبت زون میں ٹریڈ ہوتے رہے۔
گزشتہ روز پیر کے کاروباری سیشن میں اسٹاک مارکیٹ منافع کے حصول کے باعث دباؤ کا شکار رہی تھی، جہاں کے ایس ای 100 انڈیکس 450.89 پوائنٹس کمی کے بعد 178,471.87 پوائنٹس پر بند ہوا تھا۔
عالمی سطح پر ایشیائی اسٹاک مارکیٹس میں ملا جلا رجحان دیکھا گیا جبکہ تیل کی قیمتوں میں بہتری آئی۔
مزید پڑھیں: امریکا ایران امن معاہدہ پاکستان کے لیے باعثِ فخر، عالمی معیشت کے لیے مثبت پیشرفت ہے، وزیر خزانہ
امریکی جانب سے ایران پر پابندیوں میں نرمی کے فیصلے کے بعد سرمایہ کار فیڈرل ریزرو کی ممکنہ سخت مالیاتی پالیسی کے خدشات کا جائزہ لے رہے ہیں۔
جاپان کے علاوہ ایم ایس سی آئی ایشیا پیسیفک انڈیکس 0.5 فیصد کم ہوا، جبکہ ایس اینڈ پی 500 ای منی فیوچرز 0.2 فیصد نیچے آئے۔
جاپان کا نکی 225 انڈیکس 0.6 فیصد کمی کا شکار رہا، جبکہ جنوبی کوریا کی مارکیٹ میں 2 فیصد تک کمی دیکھی گئی، دوسری جانب تائیوان کی مارکیٹ نے نئی بلند ترین سطح کو چھو لیا۔
مزید پڑھیں: پاکستان اسٹاک مارکیٹ کی تاریخی بلندی کا ملک کی معیشت سے کتنا تعلق ہے؟
امریکی اسٹاک مارکیٹ میں بھی مندی کا رجحان رہا، جہاں ایس اینڈ پی 500 میں 0.4 فیصد اور نیسڈیک میں 1.3 فیصد کمی ریکارڈ کی گئی۔
ماہرین کے مطابق سرمایہ کار فیڈرل ریزرو کی ممکنہ سخت مانیٹری پالیسی اور شرح سود میں اضافے کے امکانات کو مدنظر رکھتے ہوئے محتاط رویہ اختیار کیے ہوئے ہیں۔
