پیرس سے سیئٹل جانے والی ڈیلٹا ایئرلائنز کی پرواز میں دورانِ سفر واش روم کے نظام میں خرابی کے باعث طیارے کو 2 مرتبہ راستہ تبدیل کرنا پڑا، جس کے نتیجے میں 209 مسافر گھنٹوں سفر میں پھنسے رہے اور بالآخر لندن اور نیویارک کے راستے سیئٹل پہنچے۔
فوکس نیوز کے مطابق ڈیلٹا کی پرواز 81 نے 13 اگست کو پیرس کے چارلس ڈی گال ایئرپورٹ سے سیئٹل کے لیے اڑان بھری تھی۔ ایئربس اے 330-900 میں 209 مسافر اور 13 رکنی عملہ سوار تھا۔ دورانِ پرواز واش روم میں مکینیکل خرابی پیدا ہوئی جس پر عملے نے طیارے کا رخ لندن کے ہیتھرو ایئرپورٹ کی جانب موڑ دیا۔
Delta flight diverted twice after lavatory leak floods cabin, leaves passengers stranded for hours https://t.co/3gNxbxIg93 #FoxNews
— Jeff Robinson, CEO and Chairman of $MRES and $MMAZ (@contrariansmind) August 15, 2026
ہیتھرو پہنچنے سے قبل پائلٹس نے ایئر ٹریفک کنٹرول کو ہنگامی صورتحال سے آگاہ کیا کیونکہ طیارے کو مقررہ وزن سے زیادہ وزن کے ساتھ لینڈنگ کرنا تھی۔ تاہم طیارے نے ہیتھرو پر بحفاظت لینڈنگ کی۔
لندن میں ڈیلٹا کے تکنیکی عملے نے واش روم سے متعلق خرابی دور کرنے کے لیے طیارے کی مرمت کی۔ مرمت مکمل ہونے کے بعد پرواز نے دوبارہ اڑان بھری، تاہم عملے کے دستیاب ڈیوٹی ٹائم کے باعث براہِ راست سیئٹل جانے کے بجائے طیارے کو نیویارک کے جان ایف کینیڈی ایئرپورٹ لے جایا گیا۔
یہ بھی پڑھیں:امریکی فضائی کمپنی ڈیلٹا ایئر لائنز شدید انتظامی مسائل کا شکار، سینکڑوں پروازیں منسوخ
مسافروں نے نیویارک میں امریکی کسٹمز کی کارروائی مکمل کی، جس کے بعد انہیں سیئٹل روانہ کیا گیا۔ یوں معمول کی پیرس سے سیئٹل پرواز پیرس، لندن اور نیویارک کے غیر معمولی راستے سے گزر کر اپنی منزل تک پہنچی۔
ڈیلٹا ایئرلائنز نے مسافروں سے تاخیر اور پیش آنے والی صورتحال پر معذرت کرتے ہوئے کہا کہ کمپنی کی توجہ مسافروں کو محفوظ طریقے سے جلد از جلد ان کی منزل تک پہنچانے پر ہے۔
