آزاد جموں و کشمیر قانون ساز اسمبلی میں اوورسیز کشمیریوں کے لیے مختص نشست پر پاکستان مسلم لیگ (ن) کے امیدوار چودھری عبدالرحمان آرائیں بلامقابلہ رکن اسمبلی منتخب ہوگئے۔
یہ بھی پڑھیں: حکومت سازی کی تیاریاں، آزاد کشمیر کا اگلا وزیراعظم کون ہوگا؟
الیکشن کمیشن آزاد جموں و کشمیر کی جانب سے جاری کردہ امیدواروں کی تفصیلات کے مطابق اوورسیز نشست کے لیے چودھری عبدالرحمان آرائیں کے علاوہ کسی دوسرے امیدوار نے کاغذات نامزدگی جمع نہیں کرائے تھے جس کے باعث مقررہ قانونی و انتخابی مراحل کی تکمیل کے بعد انہیں بلامقابلہ کامیاب قرار دے دیا گیا۔
چودھری عبدالرحمان آرائیں کے بلامقابلہ انتخاب کے بعد آزاد کشمیر قانون ساز اسمبلی میں مسلم لیگ (ن) کی پوزیشن مزید مستحکم ہوگئی ہے جبکہ مخصوص نشستوں کے ذریعے اسمبلی کی تشکیل کا مرحلہ بھی تیزی سے آگے بڑھ رہا ہے۔
واضح رہے کہ آزاد کشمیر قانون ساز اسمبلی کی مجموعی طور پر 8 مخصوص نشستوں کے لیے انتخابی عمل جاری ہے۔ ان نشستوں میں خواتین کے لیے 5 نشستیں جبکہ علما و مشائخ، ٹیکنوکریٹ اور اوورسیز کشمیریوں کے لیے ایک ایک نشست شامل ہے۔
مزید پڑھیے: آزاد کشمیر انتخابات کا تیسرا مرحلہ، ن لیگ کو 2 حلقوں میں برتری، سابق وزیراعظم سردار عتیق کو شکست
الیکشن کمیشن کے شیڈول کے مطابق باقی مخصوص نشستوں کے لیے انتخابی عمل مکمل کیا جا رہا ہے جبکہ مخصوص نشستوں پر پولنگ 24 اگست کو ہوگی۔ اسی روز نو منتخب ارکان اسمبلی کی حلف برداری سے متعلق بھی اہم مرحلہ متوقع ہے۔
