فیس بک اور انسٹاگرام کی مالک کمپنی میٹا پلیٹ فارمز نے بچوں اور نوجوانوں کو سوشل میڈیا کا عادی بنانے کے الزامات کے تصفیے کے لیے امریکا کی تقریباً تمام ریاستوں کے ساتھ معاہدہ کرلیا ہے.
مذکورہ معاہدوں کے تحت کمپنی آئندہ ایک دہائی کے دوران 18 ارب ڈالر تک ادا کرے گی اور نوعمر صارفین کے لیے فیس بک اور انسٹاگرام کے استعمال پر سخت پابندیاں عائد کرے گی۔
یہ بھی پڑھیں: فیس بک، انسٹا کی مدر کمپنی میٹا کے خلاف مقدمہ کو ’تاریخی‘ کیوں قرار دیا جارہا ہے؟
بدھ کو اعلان کیے گئے معاہدوں کے نتیجے میں میٹا کے خلاف جاری وفاقی مقدمے کا اختتام ہوگیا، مقدمے میں الزام عائد کیا گیا تھا کہ کمپنی کی مصنوعات بچوں کو نقصان پہنچا رہی ہیں اور میٹا نے اپنے پلیٹ فارمز کی حفاظت سے متعلق عوام کو گمراہ کیا۔
کیلیفورنیا، کولوراڈو، کینٹکی اور نیو جرسی سمیت 4 ریاستیں تقریباً 200 ارب ڈالر تک سول جرمانوں کا مطالبہ کرنے والی تھیں۔
Meta agreed to pay up to $18 billion to resolve claims by most US states that it designed Facebook and Instagram to addict children. Victoria Hinks, whose daughter died by suicide at age 16, said she is ‘very pleased’ by the settlements https://t.co/mFccegGVkc pic.twitter.com/ppn42AXB5Y
— Reuters (@Reuters) August 26, 2026
معاہدے کے تحت میٹا نوعمر صارفین کے لیے فیس بک اور انسٹاگرام کے استعمال کو روزانہ زیادہ سے زیادہ 2 گھنٹے تک محدود کرے گی، جبکہ والدین کی اجازت نہ ہونے کی صورت میں رات 12 بجے سے صبح 6 بجے تک ان پلیٹ فارمز کا استعمال بند رہے گا۔
کمپنی اسکول کے اوقات، یعنی صبح 8 بجے سے سہ پہر 3 بجے تک، نوجوانوں کو بھیجی جانے والی بیشتر ’پش نوٹیفکیشنز‘ بھی بند کرے گی۔
مزید پڑھیں: بچوں کی حفاظت میٹا کی ترجیح نہیں تھی، سابق انجینیئر کی عدالت میں گواہی
اس کے علاوہ بچوں کو عمر کی پابندی والے مواد تک رسائی سے روکنے کے لیے حفاظتی اقدامات مزید سخت کیے جائیں گے۔
اگر اسنیپ چیٹ، ٹک ٹاک اور یوٹیوب بھی اسی نوعیت کی پابندیاں نافذ کرتے ہیں تو میٹا کے لیے یہ شرائط مزید سخت ہوسکتی ہیں۔
معاہدے کے تحت 47 امریکی ریاستوں، واشنگٹن ڈی سی، پورٹو ریکو، امریکن ساموا اور ناردرن ماریانا آئی لینڈز کو میٹا تقریباً 16.7 ارب ڈالر تک ادا کرے گی۔
کیلیفورنیا کو تقریباً 2.2 ارب ڈالر اور نیویارک کو 1.1 ارب ڈالر ملنے کی توقع ہے، جبکہ ٹیکساس نے ایک الگ معاہدے کے تحت ایک ارب ڈالر سے زائد کی رقم حاصل کی ہے۔
بعض ریاستیں رقم کا ایک حصہ بچوں کی ذہنی صحت سے متعلق اقدامات کے لیے مختص کریں گی۔
مزید پڑھیں: جرمن تنظیم نے میٹا کے مصنوعی ذہانت والی گلاسز کے خلاف مقدمہ دائر کردیا
میٹا نے کسی غلطی کا اعتراف نہیں کیا تاہم کمپنی نے کہا کہ نوجوانوں کے لیے اپنے پلیٹ فارمز پر محفوظ اور مثبت تجربہ یقینی بنانا اس کی اہم ترجیح ہے۔
کمپنی کے مطابق مجموعی ادائیگی اس کے تقریباً 3 سے 4 ماہ کے منافع اور ایک ماہ کی آمدن کے برابر ہے۔
معاہدے میں میٹا کی ذاتی نوعیت کی سفارشات یا ہدفی اشتہارات ختم کرنے کی شرط شامل نہیں کی گئی۔ تاہم یہ پیش رفت سوشل میڈیا کمپنیوں کے خلاف بچوں کی ذہنی صحت اور آن لائن تحفظ سے متعلق ہزاروں مقدمات کے لیے ایک مثال بن سکتی ہے۔
مزید پڑھیں: میٹا کے کیمرا نصب اسمارٹ چشموں پر برطانیہ میں رازداری کے خدشات، کئی مقامات پر پابندی
معاہدے میں کیمبرج اینالیٹیکا اسکینڈل سے متعلق صارفین کے رازداری کے دعووں کے تصفیے کے لیے مزید 459 ملین ڈالر کی ادائیگی بھی شامل ہے۔
امریکی ضلعی جج نے بدھ کو مرکزی معاہدے کی منظوری دیتے ہوئے اسے ’آگے بڑھنے کی جانب ایک اچھا قدم‘ قرار دیا۔
تاہم نیو میکسیکو اور فلوریڈا نے معاہدہ قبول نہیں کیا۔ فلوریڈا کے اٹارنی جنرل نے کہا کہ میٹا کی ادائیگیاں بچوں کو پہنچنے والے مبینہ نقصانات کے مقابلے میں معمولی ہیں اور ریاست مقدمہ جاری رکھے گی۔
