وفاقی وزیر توانائی سردار اویس احمد خان لغاری نے سندھ طاس معاہدے سے متعلق ثالثی عدالت کے فیصلے کو پاکستان کے لیے ایک اہم سفارتی فتح قرار دیا ہے۔
ایکس پر اپنے ایک بیان میں اویس لغاری نے کہا کہ سندھ طاس معاہدے سے متعلق ثالثی عدالت کا فیصلہ پاکستان کے لیے ایک اہم سفارتی فتح ہے۔
وفاقی وزیر توانائی کا کہنا تھا کہ بھارت اس فیصلے کو مسترد کرکے خود کو مزید تنہا کر رہا ہے۔
انہوں نے کہاکہ بھارت دی ہیگ میں اس عدالت کی تشکیل پر سوالات اٹھا رہا ہے، جبکہ وہ خود کو ایک انتہا پسند، جارحانہ اور سخت گیر ہمسایہ ظاہر کر رہا ہے۔
اویس لغاری نے کہاکہ پاکستان ہمیشہ بھارت کو ایسا ہی ہمسایہ قرار دیتا آیا ہے۔
انہوں نے کہا کہ بالآخر دنیا ہندوستان کو ایک ایسے ملک کے طور پر دیکھ رہی ہے، جو پاکستان کی آبادی کو بھوکا رکھنے کے لیے تیار ہے۔
