پنجاب کے ایک تھیٹر میں کم عمر لڑکے کی ڈانس پرفارمنس دیکھنے کی ویڈیو سوشل میڈیا پر وائرل ہونے کے بعد متعلقہ حکام نے کارروائی کرتے ہوئے تھیٹر کو سیل کردیا۔
سوشل میڈیا پر گردش کرنے والی ویڈیو میں ایک کم عمر لڑکے کو تھیٹر میں ڈانس پرفارمنس دیکھتے ہوئے دیکھا جاسکتا ہے جس کے بعد معاملہ حکام کی توجہ کا مرکز بن گیا۔
View this post on Instagram
ویڈیو سامنے آنے کے بعد پنجاب کی وزیر اطلاعات و ثقافت عظمیٰ بخاری کی ہدایت پر متعلقہ تھیٹر کو سیل کردیا گیا۔ حکام کے مطابق واقعے کا نوٹس لیتے ہوئے تھیٹر انتظامیہ کے خلاف قانونی اور انتظامی کارروائی شروع کردی گئی ہے جبکہ مزید کارروائی بھی جاری ہے۔
سوشل میڈیا صارفین نے بھی واقعے پر تنقید کی، مشی خان نے اپنے ویڈیو پیغام میں کہا کہ انہوں نے انسٹاگرام پر ایک کلپ دیکھا جس میں 10 سالہ بچہ اسٹیج ڈانسر کے رقص کے ایسے انداز کی تعریف کرتا نظر آیا جو ان کے مطابق نامناسب تھے۔
View this post on Instagram
اداکارہ نے سوال اٹھایا کہ اتنی کم عمر بچے کو اس نوعیت کے پروگرام میں شرکت یا اسے دیکھنے کی اجازت کیسے دی جا سکتی ہے۔ انہوں نے کہا کہ ملک میں بچوں کے تحفظ کے لیے واضح اور سخت ضابطۂ کار (SOPs) کی ضرورت ہے۔ مشی خان کا کہنا تھا کہ پاکستان میں بچوں سے زیادتی کے واقعات سامنے آتے رہتے ہیں، اس لیے بچوں کی تربیت اور انہیں فراہم کیے جانے والے ماحول پر بھی توجہ دینے کی ضرورت ہے۔
دوسری جانب سوشل میڈیا صارفین کی جانب سے بھی ویڈیو پر مختلف ردعمل سامنے آرہے ہیں۔ بعض صارفین نے تھیٹر میں کم عمر بچوں کی موجودگی پر سوالات اٹھائے۔
واضح رہے کہ پنجاب حکومت کی جانب سے تھیٹرز میں ضابطہ اخلاق کی پابندی اور فیملیز کے لیے موزوں ماحول یقینی بنانے پر زور دیا جاتا رہا ہے۔
