سیکیورٹی فورسز نے ضلع ڈیرہ اسماعیل خان کے عام علاقے زرکانی میں خوارج کی موجودگی کی اطلاع پر انٹیلی جنس بیسڈ آپریشن کیا جس کے نتیجے میں 6 بھارت نواز دہشتگرد ہلاک ہوگئے تاہم اس کوشش کے دوران پاک فوج کے 2 جوانوں نے بے جگری سے مقابلہ کرتے ہوئے شہادت کا رتبہ پایا۔
یہ بھی پڑھیں: ہلاک 260 افغان دہشتگردوں کی شناخت اور دستاویزی ثبوتوں نے طالبان اور فتنہ الخوارج کے گٹھ جوڑ کا بھانڈا پھوڑ دیا
آئی ایس پی آر کے مطابق آپریشن بھارتی پراکسی فتنہ الخوارج سے تعلق رکھنے والے خوارج کی موجودگی کی اطلاع پر کیا گیا۔
سیکیورٹی فورسز کی انتہائی مہارت سے کیے گئے آپریشن کے دوران 6 بھارتی سپانسرڈ خوارج ہلاک ہوگئے۔
تاہم شدید فائرنگ کے تبادلے کے دوران نائیک غلام مرتضیٰ (عمر 36 سال، ساکن ضلع گجرات) اور سپاہی تاثیر احمد (عمر 30 سال، ساکن ضلع تلہ گنگ) بہادری سے لڑتے ہوئے جام شہادت نوش کر گئے۔
ہلاک خوارج سے اسلحہ اور گولہ بارود بھی برآمد ہوا جو سیکیورٹی فورسز اور قانون نافذ کرنے والے اداروں کے خلاف اور معصوم شہریوں کے قتل کی متعدد دہشتگرد کارروائیوں میں سرگرم رہے۔
علاقے میں کسی اور بھارتی سپانسرڈ خارجی کے خاتمے کے لیے سینیٹائزیشن آپریشن جاری ہے۔
مزید پڑھیے: خیبر پختونخوا میں 10 خوارج ہلاک، 6 سیکیورٹی اہلکار شہید
آئی ایس پی آر نے کہا ہے کہ وفاقی ایپکس کمیٹی برائے نیشنل ایکشن پلان کی منظور کردہ وژن ’عزم استحکام‘ کے تحت سیکیورٹی فورسز اور قانون نافذ کرنے والے اداروں کی جانب سے دہشتگردی کے خلاف بھرپور مہم اسی جوش و خروش سے جاری رہے گی تاکہ ملک سے غیر ملکی سرپرستی یافتہ دہشتگردی کی لعنت کو جڑ سے اکھاڑ پھینکا جا سکے اور ہمارے بہادر سپاہیوں کی ایسی قربانیاں ہر قیمت پر قوم کے تحفظ کے ہمارے غیر متزلزل عزم کو مزید تقویت دیتی ہیں۔
