قومی ویمنز کرکٹ ٹیم کی کپتان فاطمہ ثنا نے ایشین گیمز 2026 میں پاکستان کے 2 پرچم برداروں میں سے ایک نامزد ہونے پر بے حد خوشی کا اظہار کرتے ہوئے کہا کہ اس سے بڑا کوئی اعزاز نہیں۔
یہ بھی پڑھیں: بھارتی بیٹر شفالی ورما کو ’پویلین لوٹ جائیے‘ کا اشارہ فاطمہ ثنا کو مہنگا پڑگیا، میچ فیس کا 10 فیصد گیا
فاطمہ ابھرتے ہوئے اسکواش کھلاڑی نور زمان کے ہمراہ 20 ویں ایڈیشن کے گیمز کی شاندار افتتاحی تقریب میں پاکستان کے دستے کی قیادت کریں گی جو 19 ستمبر کو آئیچی-ناگویا میں منعقد ہوگی۔
24 سالہ فاطمہ جو اس وقت گیمز میں ویمنز کرکٹ مقابلے میں پاکستان کی قیادت کر رہی ہیں نے بین الاقوامی سطح پر ملک کی نمائندگی کا موقع ملنے پر اظہار تشکر کیا اور کہا کہ وہ اسے بھرپور طریقے سے انجوائے کرنے کی کوشش کریں گی۔
Proud moment for Pakistan captain @imfatimasana 💫
She will be Pakistan's flag bearer along with squash player Noor Zaman at the Asian Games opening ceremony 🇵🇰🙌#AsianGames | #BackOurGirls pic.twitter.com/qzo22GUQa0
— Pakistan Cricket (@TheRealPCB) September 18, 2026
پاکستان کرکٹ بورڈ (پی سی بی) کی جانب سے جاری کردہ ویڈیو میں فاطمہ نے کہا کہ ’سب سے پہلے، الحمدللہ کہ مجھے یہ موقع ملا ہے۔ کسی بھی حیثیت میں پاکستان کی خدمت کرنا اعزاز کی بات ہے اور پاکستان کا جھنڈا اٹھانا اور دنیا میں پاکستان کی نمائندگی کرنے سے بڑا کوئی اعزاز نہیں۔
مزید پڑھیے: فاطمہ ثنا کی عالمی کرکٹ میں دھوم، کینیڈا سپر 60 کی فرنچائز سے معاہدہ
انہوں نے مزید کہا کہ میرے خیال میں یہ میرے لیے بھی ایک اچھا موقع ہے۔ میں کوشش کروں گی کہ اسے زیادہ سے زیادہ انجوائے کروں اور اسی طرح پاکستان کی خدمت جاری رکھوں اور مزید محنت کروں تاکہ پاکستان کا نام بلند ہو۔
پاکستان اولمپک ایسوسی ایشن (پی او اے) کے مطابق، کرکٹ، اسکواش، ہاکی، ایتھلیٹکس اور ای اسپورٹس سمیت 23 مختلف شعبوں کے کل 246 ایتھلیٹس گیمز میں پاکستان کی نمائندگی کریں گے جو 4 اکتوبر تک جاری رہیں گے۔
گیمز کا ویمنز کرکٹ مقابلہ افتتاحی تقریب سے پہلے ہی شروع ہو چکا ہے اور چاروں سیمی فائنلسٹ کی تصدیق ہو چکی ہے۔
پاکستان ویمنز ٹیم نے جمعرات کو دوسرے کوارٹر فائنل میں تھائی لینڈ کو شکست دی تھی اور اب اتوار کو نشین کے کوروگی اسپورٹس پارک میں پہلے سیمی فائنل میں سری لنکا سے نبردآزما ہوگی۔
