پاکستان ویمن کرکٹ ٹیم کی کپتان فاطمہ ثنا کو رواں سال ہونے والے کینیڈا سپر 60 کے لیے ’وینکوور اینکرز‘ نے اپنی ٹیم میں شامل کر لیا ہے۔ ٹورنامنٹ 29 ستمبر سے 4 اکتوبر تک کھیلا جائے گا۔
فرنچائز لیگ نے اپنے سوشل میڈیا اکاؤنٹس پر 24 سالہ فاسٹ بولنگ آل راؤنڈر کی گرافک شیئر کرتے ہوئے ان کی شمولیت کا اعلان کیا۔
لیگ کی جانب سے جاری بیان میں کہا گیا کہ جس بڑی خبر کا شائقین انتظار کر رہے تھے، وہ آ گئی ہے، فاطمہ ثنا اس سیزن میں وینکوور اینکرز کی نمائندگی کرتے ہوئے اپنی صلاحیتوں کا بھرپور مظاہرہ کریں گی۔
دی ہنڈرڈ کھیلنے والی پہلی پاکستانی ویمن کرکٹر بننے کے قریب
یہ اعلان ایسے وقت میں سامنے آیا ہے جب فاطمہ ثنا سے توقع کی جا رہی ہے کہ وہ دی ہنڈرڈ میں شرکت کرنے والی پاکستان کی پہلی خاتون کرکٹر بن جائیں گی۔
امکان ہے کہ وہ برمنگھم فونکس کی جانب سے سدرن بریوز کے خلاف ساؤتھمپٹن میں ہونے والے میچ میں میدان میں اتریں گی۔
فاطمہ ثنا کو برمنگھم فونکس نے اپنے چوتھے اوورسیز کھلاڑی کے طور پر اسکواڈ میں شامل کیا ہے۔ یہ جگہ اس وقت خالی ہوئی جب کرکٹ آسٹریلیا نے ورک لوڈ مینجمنٹ کے تحت لوسی ہیملٹن کو ٹورنامنٹ سے واپس بلا لیا۔
فاطمہ ثنا کو اس ایونٹ میں کم از کم 15 ہزار برطانوی پاؤنڈ (قریباً 56 لاکھ پاکستانی روپے) معاوضہ ملے گا۔
ورلڈ کپ میں شاندار آل راؤنڈ کارکردگی کے بعد معاہدہ
فاطمہ ثنا کی یہ سلیکشن آئی سی سی ویمنز ٹی20 ورلڈ کپ 2026 میں جنوبی افریقہ کے خلاف شاندار آل راؤنڈ کارکردگی کے فوراً بعد سامنے آئی۔
ایجبسٹن میں کھیلے گئے میچ میں انہوں نے آٹھویں نمبر پر بیٹنگ کرتے ہوئے 38 گیندوں پر ناقابل شکست 55 رنز بنائے، جبکہ بولنگ میں 16 رنز دے کر 3 وکٹیں حاصل کیں۔ تاہم پاکستان کو سنسنی خیز مقابلے میں 2 وکٹوں سے شکست کا سامنا کرنا پڑا۔
دی ہنڈرڈ میں معاہدہ حاصل کرنے والی تیسری پاکستانی کھلاڑی
فاطمہ ثنا رواں سال دی ہنڈرڈ میں معاہدہ حاصل کرنے والی تیسری پاکستانی کرکٹر بھی بن گئی ہیں۔ ان سے قبل عثمان طارق برمنگھم فونکس جبکہ ابرار احمد کو مارچ میں ہونے والی نیلامی میں 190 ہزار برطانوی پاؤنڈ کے معاہدے پر سن رائزرز لیڈز نے اپنی ٹیم میں شامل کیا تھا۔
