جوہانسبرگ میں کھیلے گئے دوسرے ون ڈے میں ڈیوڈ ملر اور تمبا باووما کی شاندار سینچریوں کی بدولت جنوبی افریقہ نے آسٹریلیا کو 32 رنز سے شکست دے کر 3 میچوں کی سیریز میں 0-2 کی فیصلہ کن برتری حاصل کر لی ہے۔
آسٹریلیا کی دعوت پر پہلے بیٹنگ کرتے ہوئے پروٹیز نے مقررہ 50 اوورز میں 9 وکٹوں کے نقصان پر 365 رنز کا پہاڑ جیسا اسکور کھڑا کیا۔
جواب میں آسٹریلوی ٹیم تمام تر کوششوں کے باوجود 49.5 اوورز میں 333 رنز بنا کر آؤٹ ہو گئی اور اسے مسلسل دوسرے میچ میں ناکامی کا سامنا کرنا پڑا۔
یہ بھی پڑھیں:چیمپیئنز ٹرافی: بھارت کی ضد نے آسٹریلیا اور جنوبی افریقہ کو مشکل میں ڈال دیا
جنوبی افریقی اننگز کا بنیادی سٹرکچر کپتان تمبا باووما اور ڈیوڈ ملر کی بہترین اننگز کے گرد گھومتا رہا۔ باووما نے 116 گیندوں پر 103 رنز کی ذمہ دارانہ اننگز کھیلی جو ان کے ون ڈے کیریئر کی 6 ویں سینچری تھی۔
SOUTH AFRICA VS AUSTRALIA — 2ND INNINGS HIGHLIGHTS! 🇿🇦🇦🇺🔥
All the best moments from Australia’s chase! 🏏 pic.twitter.com/YWwLJoxxNP
— Rehan 56 (@imrehan056) September 27, 2026
دوسری جانب ڈیوڈ ملر نے جارحانہ انداز اپنایا اور 9 چھکوں کی مدد سے صرف 93 گیندوں پر 142 رنز کی کیریئر بیسٹ اور اپنے کیریئر کی 8 ویں سینچری اسکور کی۔
آسٹریلیا کی جانب سے اپنا دوسرا ون ڈے کھیلنے والے جیک ایڈورڈز سب سے کامیاب بولر رہے جنہوں نے 10 اوورز میں 67 رنز دے کر 5 وکٹیں حاصل کیں۔
تاہم، فاسٹ بولر پیٹ کمنز کی عدم موجودگی اور میچ کے دوران ناتھن ایلس کی پسلیوں میں کھچاؤ کے باعث ان کی بولنگ لائن مشکلات کا شکار رہی اور ایلس صرف 4 اوورز ہی کروا سکے۔
آسٹریلیا کا جارحانہ آغاز اور سپنرز کا جادو
366 رنز کے تعاقب میں آسٹریلیا نے انتہائی طوفانی آغاز کیا۔ کپتان مچ مارش اور ٹریوس ہیڈ نے پہلے وکٹ کی شراکت میں صرف 17 اوورز میں 130 رنز جوڑے۔ دونوں بلے بازوں نے بالترتیب 53 اور 76 گیندوں پر 84، 84 رنز بنائے۔
تاہم، ابتدائی شراکت ٹوٹنے کے بعد مڈل آرڈر جنوبی افریقی سپنرز کے سامنے ریت کی دیوار ثابت ہوا۔
کیشو مہاراج 54 رنز کے عوض 2 وکٹیں، بیورن فورٹوئن 70 رنز کے عوض 2 وکٹیں اور ایڈن مارکرم 55 رنز کے عوض 1 وکٹ لینے میں کامیاب ہوئے۔
South Africa beat Australia by 32 runs, winning the series 2-0! 🙌 pic.twitter.com/Mxpi3ltO0X
— Sky Sports Cricket (@SkyCricket) September 27, 2026
پروٹیز بولرز نے اپنے 10، 10 اوورز کے کوٹے میں نپی تلی بولنگ سے آسٹریلوی اننگز کی بریکیں لگا دیں۔ اننگز کے اختتام پر زیویئر بارٹلیٹ نے 28 گیندوں پر 50 رنز بنا کر میچ میں جان ڈالنے کی کوشش کی لیکن وہ ٹیم کو فتح نہ دلا سکے۔
کپتانوں کے تاثرات
میچ کے بعد آسٹریلوی کپتان مچ مارش نے مایوسی کا اظہار کرتے ہوئے کہا کہ ’ہم سیریز 1-1 سے برابر کرنے کی نیت سے آئے تھے لیکن جنوبی افریقہ نے شاندار کھیل پیش کیا اور ہمیں آؤٹ پلے کر دیا۔
ہم وائٹ واش سے بچنے کے لیے پوچیفسٹروم میں ہونے والے آخری میچ میں فتح حاصل کرنے کی پوری کوشش کریں گے۔‘
مزید پڑھیں:آسٹریلیا اور آئر لینڈ ٹی20 ورلڈ کپ سے باہر، زمبابوے کی سپر ایٹ مرحلے میں رسائی
جنوبی افریقی کپتان تمبا باووما نے ٹیم کی آل راؤنڈ کارکردگی کو سراہتے ہوئے کہا کہ ’شروع میں حالات تھوڑے مشکل تھے لیکن ڈیوڈ ملر نے ناقابلِ یقین اننگز کھیلی اور بولرز نے بھی اپنا کام بہترین انداز میں مکمل کیا۔‘
یہ فتح آسٹریلیا کے خلاف جنوبی افریقہ کے حالیہ تسلط کی عکاسی کرتی ہے، جہاں پروٹیز نے دونوں ٹیموں کے درمیان کھیلے گئے گزشتہ 25 ون ڈے میچوں میں سے 19 ویں فتح اپنے نام کی ہے۔
اس سے قبل ڈربن میں کھیلے گئے پہلے ون ڈے میں بھی جنوبی افریقہ نے آسٹریلیا کو 67 رنز سے شکست دی تھی۔ دونوں ٹیموں کے درمیان سیریز کا تیسرا اور آخری ون ڈے میچ بدھ کو پوچیفسٹروم میں کھیلا جائے گا۔
