نائب امیر جماعت اسلامی پاکستان لیاقت بلوچ نے ذرائع ابلاغ پر چلنے والی ان رپورٹس کو مکمل طور پر غلط اور من گھڑت قرار دے کر مسترد کر دیا ہے جن میں دعویٰ کیا گیا تھا کہ امیر جماعت اسلامی پاکستان حافظ نعیم الرحمان نے پیٹرولیم لیوی میں صرف 35 سے 40 روپے کمی کا مطالبہ کیا ہے۔
جماعت اسلامی کے شعبہ اطلاعات کی جانب سے جاری کردہ ایک خصوصی بیان میں لیاقت بلوچ نے وضاحت کی کہ ایک خاص ایجنڈے کے تحت امیر جماعت اسلامی سے منسوب لغو اور گمراہ کن معلومات پھیلائی جا رہی ہیں۔
یہ بھی پڑھیے لانگ مارچ ختم نہیں کیا بلکہ صرف روکا گیا ہے، حافظ نعیم الرحمان
انہوں نے واضح کیا کہ جماعت اسلامی گزشتہ ڈیڑھ ماہ سے زائد عرصے سے عوام پر لیوی اور مختلف ٹیکسز کے نام پر مسلط کردہ ‘بھتہ خوری’ کے خلاف احتجاجی دھرنے اور مارچ کر رہی ہے۔
جماعت اسلامی کی اولین ترجیح پیٹرولیم مصنوعات پر لیوی اور دیگر ٹیکسوں کی مد میں وصول کیے جانے والے 130 روپے سے زائد کے اضافی بوجھ کا مکمل خاتمہ ہے۔
انہوں نے مزید بتایا کہ وزیراعظم کی جانب سے رابطہ کرنے پر بھی حافظ نعیم الرحمان نے اس بھتہ خوری کے مکمل خاتمے کا ہی مطالبات پیش کیا تھا۔ وزیراعظم نے بیرون ملک دورے سے واپسی پر قوم کو بڑے ریلیف پیکج دینے کی یقین دہانی کرائی تھی، اور جماعت اسلامی کو امید ہے کہ وزیراعظم اپنا وعدہ پورا کریں گے۔
یہ بھی پڑھیے وزیر داخلہ کی حافظ نعیم الرحمان سے ملاقات، اہم قومی و علاقائی امور زیر بحث
نائب امیر جماعت اسلامی نے خبردار کیا کہ اگر حکومت نے اپنے وعدے کے مطابق عوام کو ریلیف نہ دیا اور مطالبات تسلیم نہ کیے تو جماعت اسلامی ملتان سے اسلام آباد کی جانب ‘سپر مارچ’ کا آغاز کرے گی۔
