نائب وزیراعظم و وزیر خارجہ اسحاق ڈار نے پاکستان کی زیر صدارت شنگھائی تعاون تنظیم یعنی ایس سی او کے رکن ممالک کے درمیان باہمی اعتماد، مساوات، مشاورت اور مشترکہ ترقی کے اصولوں کے تحت کھلے، جامع اور تعمیری تعاون کے عزم کا اعادہ کیا ہے۔
یہ بھی پڑھیں: پاکستان ایس سی او کونسل آف ہیڈز آف اسٹیٹ کی صدارت سنبھالنے کو تیار
وزارت خارجہ کے ترجمان کے مطابق نائب وزیراعظم و وزیر خارجہ نے اسلام آباد میں وزارت خارجہ میں ایس سی او کے رکن ممالک کے قومی رابطہ کاروں، ایس سی او سیکریٹریٹ اور ایس سی او ریجنل اینٹی ٹیررسٹ اسٹرکچر کے سینئر نمائندوں سے خطاب کیا۔
اس موقع پر اسحاق ڈار نے پاکستان کی چیئرمین شپ کے تحت کونسل آف نیشنل کوآرڈی نیٹرز کے پہلے اجلاس میں شریک نمائندوں کا خیرمقدم کیا۔
@MIshaqDar50 @DPM_PK addressed the National Coordinators of #SCO Member States, along with senior representatives of the SCO Secretariat and SCO RATS at @ForeignOfficePk
Welcomed them to the first meeting of the Council of National Coordinators under Pakistan’s Chairmanship, pic.twitter.com/jRwd3nblAo— Shaukat Piracha (@ShaukatPiracha1) September 30, 2026
انہوں نے کہا کہ پاکستان کی ایس سی او چیئرمین شپ باہمی اعتماد، باہمی مفاد، مساوات، مشاورت اور مشترکہ ترقی پر مبنی ’شنگھائی اسپرٹ‘ کے اصولوں کے مطابق کھلے، جامع اور تعمیری انداز میں آگے بڑھائی جائے گی۔
نائب وزیراعظم نے پاکستان کی چیئرمین شپ کے موضوع ’ویژن کو عملی اقدامات میں بدلنا: رابطہ کاری، جدت اور مشترکہ خوشحالی‘ کو اجاگر کرتے ہوئے اس بات پر زور دیا کہ ایس سی او کے مشترکہ وژن کو عملی تعاون اور ٹھوس نتائج میں تبدیل کیا جائے۔
اسحاق ڈار نے 2027 میں اسلام آباد میں ایس سی او کونسل آف ہیڈز آف اسٹیٹ کی میزبانی کے لیے جاری تیاریوں کا بھی ذکر کیا اور پاکستان کی چیئرمین شپ کو کامیاب بنانے کے لیے تنظیم کے رکن ممالک کے درمیان قریبی رابطہ کاری اور تعاون کی ضرورت پر زور دیا۔
پاکستان اس وقت شنگھائی تعاون تنظیم کی چیئرمین شپ سنبھالے ہوئے ہے، جبکہ 2027 میں اسلام آباد ایس سی او کونسل آف ہیڈز آف اسٹیٹ کے اجلاس کی میزبانی کرے گا۔
