پاکستانی اداکار احد رضا میر نے شوبز انڈسٹری سے وقفہ لینے کا اعلان کردیا جس کے بعد مداحوں کی جانب سے مختلف قیاس آرائیاں کی جارہی ہیں۔
احد رضا میر کے ایک لائیو سیشن کی ویڈیو سوشل میڈیا پر گردش کررہی ہے جس میں اداکار نے اعلان کیا کہ وہ اگلے سال شوبز سے وقفہ لینے کا ارادہ رکھتے ہیں۔
View this post on Instagram
احد رضا میر نے اپنے مداحوں سے گفتگو کرتے ہوئے کہا کہ وہ اگلے سال چھٹی لے رہے ہیں اور انہوں نے اس بارے میں مداحوں کو پہلے سے آگاہ کرنے کا فیصلہ کیا ہے تاکہ وہ ان کے اس فیصلے کے لیے تیار رہیں۔
اداکار کا کہنا تھا کہ وہ مکمل طور پر منظر سے غائب ہوجائیں گے، اپنے خاندان کے ساتھ وقت گزاریں گے اور انسٹاگرام سے بھی دور رہیں گے۔ انہوں نے اپنے اس فیصلے کو ’نیم ریٹائرمنٹ‘ قرار دیا۔
یہ بھی پڑھیں: پاکستانی ڈرامے اے آئی سے لکھے جا رہے ہیں، سید محمد احمد کا چونکا دینے والا انکشاف
احد رضا میر کے اعلان کے بعد سوشل میڈیا صارفین کی جانب سے مختلف تبصرے کیے جارہے ہیں۔ بعض مداحوں نے قیاس کیا کہ شاید اداکار اپنی شادی کی منصوبہ بندی کررہے ہیں جبکہ کچھ کا کہنا ہے کہ گزشتہ دو برس سے مسلسل کام کرنے کے بعد انہیں وقفے کی ضرورت ہے۔
ایک مداح نے امید ظاہر کی کہ احد رضا میر جہاں بھی جائیں گے اپنے مداحوں کے پاس واپس ضرور آئیں گے جبکہ ایک اور صارف نے کہا کہ اداکار کے وقفے پر جانے کے بعد شاید احد رضا میر اور اقرا عزیز کی اسکرین جوڑی دیکھنے کی خواہش پوری نہ ہوسکے۔
یہ بھی پڑھیں: ’ہر قسط کا بے صبری سے انتظار کرتے ہیں‘، بھارتی اداکار جونی لیور کس پاکستانی ڈرامے کے مداح نکلے؟
کچھ مداحوں نے یہ بھی تبصرہ کیا کہ ممکن ہے مستقبل میں احد رضا میر کو کوئی ایسا بہترین اسکرپٹ مل جائے جسے چھوڑنا ان کے لیے مشکل ہوجائے۔
واضح رہے کہ احد رضا میر کا شمار پاکستان کے معروف اداکاروں میں ہوتا ہے، جو ’یقین کا سفر‘، ’عہدِ وفا‘، ’یہ دل میرا‘، ’میم سے محبت‘ اور ’ہم تم‘ جیسے کامیاب ڈراموں میں اپنی اداکاری کے جوہر دکھا چکے ہیں۔
اداکار نے حال ہی میں گرین ٹی وی کے ڈرامے ’ایک محبت اور‘ میں ہارون ملک کا کردار ادا کیا، جسے ناظرین اور ناقدین کی جانب سے بھرپور پذیرائی ملی جبکہ وہ ان دنوں یمنیٰ زیدی کے ساتھ اپنے نئے ڈرامے ’کیفِ فراق‘ کی شوٹنگ میں مصروف ہیں۔
