وزیراعظم شہباز شریف نے کہا ہے کہ حکومت اب بھی پاکستان تحریک انصاف سے بیٹھ کر بات کرنے کے لیے تیار ہے، تاہم قانون اپنا راستہ اختیار کرے گا۔ انہوں نے کہا کہ حکومت نے مذاکرات کے دروازے بند نہیں کیے، لیکن ملکی امن، عوام کے جان و مال کا تحفظ اور ریاستی رٹ پر کوئی سمجھوتا نہیں کیا جا سکتا۔
مزید پڑھیں:پی ٹی آئی والے اٹک سے ایک قدم آگے بڑ ھ کر تو دکھائیں، گورنر فیصل کریم کنڈی
اسلام آباد میں کشمیر چوک کی افتتاحی تقریب سے خطاب میں ان کا کہنا تھا کہ دھرنوں اور لانگ مارچ کے بھیانک سائے دوبارہ نمودار ہو رہے ہیں، حکومت نے باہمی مشاورت سے پی ٹی آئی سے مذاکرات کا فیصلہ کیا، تاہم مذاکرات کے باوجود معاملہ حل نہ ہوسکا۔
وزیراعظم نے کہا کہ اسپیکر قومی اسمبلی کی سربراہی میں حکومتی اور پی ٹی آئی کمیٹی کے درمیان 2 روز مذاکرات جاری رہے، امید تھی کہ ان کے مثبت نتائج نکلیں گے اور دھرنے کی نوبت نہیں آئے گی۔ پیپلز پارٹی نے بھی مذاکرات میں پوری سنجیدگی کا مظاہرہ کیا۔
وزیراعظم نے کہا کہ پی ٹی آئی سے بات چیت کے ذریعے مسئلے کا حل نکالنے کی کوشش کی گئی اور اسے دھرنوں اور لانگ مارچ کا راستہ ترک کرنے پر آمادہ کرنا چاہتے ہیں، تاہم بدقسمتی سے مذاکرات کے باوجود معاملہ حل نہ ہوسکا۔ ان کے بقول پی ٹی آئی کا مقصد تھا کہ مذاکرات کسی صورت کامیاب نہ ہوں۔
تحریک انصاف ہوش کے ناخن لے۔ اگر تحریک انصاف اپنے دھرنے ختم کر دے تو ہم آپ کے ساتھ بیٹھ کر بات کرنے کے لیے تیار ہیں، وزیراعظم شہباز شریف https://t.co/aObJA71WXN
— WE News (@WENewsPk) October 6, 2026
شہباز شریف نے کہا کہ احتجاج اور دھرنوں کی سیاست سے ملکی معیشت کو دوبارہ نقصان پہنچنے کا خدشہ ہے۔ دھرنے اور احتجاج کا پہلا نشانہ ملکی برآمدات ہوں گی جبکہ مینوفیکچرنگ اور صنعتی سرگرمیاں بھی متاثر ہوں گی۔ انجینئرز اور کارکن وقت پر فیکٹریوں میں نہ پہنچے تو نقصان پوری قوم کا ہوگا۔
انہوں نے کہا کہ اڑھائی سال کی محنت سے ملکی معیشت کو استحکام کی طرف لایا گیا ہے اور اب معیشت میں گروتھ اور ترقی کا سفر شروع ہوچکا ہے، ملک کی ترقی کا پہیہ دوبارہ جام کرنے کی اجازت نہیں دیں گے۔ ملک کے مفاد میں لانگ مارچ اور دھرنے ختم کیے جائیں۔
وزیراعظم نے کہا کہ حکومت اب بھی پی ٹی آئی سے بیٹھ کر بات کرنے کے لیے تیار ہے، تاہم قانون اپنا راستہ اختیار کرے گا اور عوام کی جان و مال کا تحفظ حکومت کی ذمہ داری ہے۔ پاکستان کو محنت، امانت اور دیانت کے ساتھ آگے لے کر چلنا ہے، ملک کو عظیم بنانا پوری قوم کی ذمہ داری ہے۔
کشمیر چوک منصوبے کا ذکر کرتے ہوئے شہباز شریف نے کہا کہ آج کشمیر چوک کا افتتاح خوش آئند ہے اور منصوبے پر تیزی سے کام مکمل کیا گیا۔ سڑکوں، پلوں اور انڈر پاسز کی تعمیر کا مقصد عوام کا قیمتی وقت بچانا ہے۔
مزید پڑھیں:پی ٹی آئی اشتعال دلا کر لوگوں کو وفاق کے خلاف کھڑا کرتی ہے، بیرسٹر دانیال چوہدری
انہوں نے وزیر داخلہ محسن نقوی اور ان کی ٹیم کو منصوبہ ایک ماہ میں مکمل کرنے کے عزم پر خراج تحسین پیش کرتے ہوئے کہا کہ کام کی یہی تیز رفتاری، دن رات محنت اور جذبہ قوموں کو ترقی کی راہ پر گامزن کرتا ہے۔
وزیراعظم نے کہا کہ بچے تعلیم، نوجوان دفاتر اور مزدور فیکٹریوں میں جانے کے لیے محفوظ راستے چاہتے ہیں۔ ملک کی معاشی و سماجی ترقی کے لیے دن رات محنت جاری ہے اور قومی ترقی کا عمل اجتماعی کاوشوں سے آگے بڑھ رہا ہے۔
