نامیاتی کیمسٹری میں اہم دریافت، کاگن اور سوئی کو نوبیل انعام مل گیا

سائنسدان ہنری کاگن اور کینسو سوئی نے نامیاتی کیمسٹری میں غیر خطی اثرات اور غیر متناسب نامیاتی ترکیب میں خودکار عمل کی دریافت پر 2026 کا نوبیل انعام برائے کیمسٹری جیت لیا۔

نوبیل انعام دینے والے ادارے کے مطابق دونوں سائنسدانوں نے کیمسٹری کے ایک بنیادی مسئلے کو سمجھنے میں اہم کردار ادا کیا۔

یہ بھی پڑھیں: خلائی دُور بین سے ’بھوت ذرات‘ کی دریافت پر 2026 کا نوبیل انعام برائے طبیعیات

کیمسٹری کی نوبیل کمیٹی کے چیئرمین ہائنر لنکے نے وضاحت کی کہ بہت سے سالمات دو مختلف شکلوں میں پائے جاتے ہیں جو ایک دوسرے کا عکس ہوتے ہیں۔

ایسی خصوصیت رکھنے والے سالمات کو ’کائیرل‘ کہا جاتا ہے، جو یونانی زبان کے لفظ ’ہاتھ‘ سے نکلا ہے۔

BREAKING NEWS
The Royal Swedish Academy of Sciences has decided to award the 2026 #NobelPrize in Chemistry to Henri B. Kagan and Kenso Soai “for the discovery of non-linear effects and autocatalysis in asymmetric organic synthesis.” pic.twitter.com/nH090ql1Xc

— The Nobel Prize (@NobelPrize) October 7, 2026

انہوں نے مثال دیتے ہوئے کہا کہ انسانی ہاتھ ایک دوسرے کے آئینے کی طرح نظر آتے ہیں، لیکن دونوں کو ایک دوسرے کے اوپر مکمل طور پر منطبق نہیں کیا جا سکتا۔

’اسی طرح بعض سالمات بھی ایک دوسرے کے عکس ہونے کے باوجود یکساں نہیں ہوتے۔‘

کیمسٹری کا نوبیل انعام ہر سال نوبیل ہفتے کے دوران دیا جانے والا تیسرا انعام ہوتا ہے۔ اس سے قبل رواں سال طب اور طبیعیات کے نوبیل انعامات کا اعلان کیا جا چکا ہے۔

نوبیل انعامات سویڈش موجد اور صنعت کار الفریڈ نوبیل کی وصیت کے تحت 1901 سے سائنس، ادب اور امن کے شعبوں میں نمایاں خدمات کے اعتراف میں دیے جا رہے ہیں، اگرچہ عالمی جنگوں سمیت بعض مواقع پر ان کا سلسلہ منقطع بھی ہوا۔

گزشتہ برس کیمسٹری کا نوبیل انعام سوسومو کٹاگاوا، رچرڈ رابسن اور عمر یاغی کو میٹل آرگینک فریم ورکس کی تیاری پر دیا گیا تھا۔

یہ سالماتی ڈھانچے موسمیاتی تبدیلی اور صاف پانی کی کمی جیسے مسائل سے نمٹنے میں مددگار ثابت ہو سکتے ہیں۔