پاکستان میں امریکی ناظم الامور نٹیلی اے بیکر نے اسلام آباد کے پمز اسپتال میں چھاتی کے سرطان سے متعلق آگاہی مہم میں شرکت کی ہے۔
اس موقع پر وی نیوز سے خصوصی گفتگو کرتے ہوئے انہوں نے خواتین میں چھاتی کے سرطان سے متعلق شعور و آگاہی پیدا کرنے کی ضرورت پر زور دیا۔
نٹیلی اے بیکر نے پمز اسپتال کے فیڈرل بریسٹ کینسر اسکریننگ سینٹر کی خدمات کو سراہتے ہوئے کہاکہ ڈاکٹر عائشہ ثانی حکومتی تعاون سے معاشرے میں چھاتی کے سرطان سے متعلق آگاہی کے فروغ کے لیے قابل ستائش خدمات انجام دے رہی ہیں۔
انہوں نے کہاکہ پمز اسپتال میں ڈاکٹر عائشہ ثانی کے ساتھ اس آگاہی مہم کا حصہ بن کر انہیں بے حد خوشی محسوس ہورہی ہے۔ یہ مسلسل تیسرا سال ہے کہ وہ اس مہم میں شرکت کررہی ہیں۔
ان کا کہنا تھا کہ کسی بھی بیماری کے خلاف جنگ میں عوامی آگاہی کلیدی اہمیت رکھتی ہے، جبکہ چھاتی کے سرطان کا مؤثر انداز میں مقابلہ کرنے کے لیے خواتین میں شعور و آگاہی پیدا کرنا انتہائی ضروری ہے۔
