سہ ملکی ون ڈے سیریز کے پہلے میچ میں پاکستان کے سلمان علی آغا نے سری لنکن بولرز کے خلاف شاندار بیٹنگ کا مظاہرہ کرتے ہوئے سینچری اسکور کی اور قومی ٹیم کو 305 رنز کے مجموعے تک پہنچانے میں اہم کردار ادا کیا۔
راولپنڈی میں کھیلے گئے میچ میں پاکستان نے پہلے بیٹنگ کرتے ہوئے 49.5 اوورز میں تمام وکٹوں کے نقصان پر 305 رنز بنائے اور سری لنکا کو کامیابی کے لیے 306 رنز کا ہدف دیا۔
قومی ٹیم کی اننگز میں سلمان علی آغا نمایاں رہے، جنہوں نے 90 گیندوں کا سامنا کرتے ہوئے 107 رنز کی عمدہ اننگز کھیلی۔ ان کی اننگز میں 10 چوکے اور ایک چھکا شامل تھا۔
پاکستان کی بیٹنگ کا آغاز زیادہ متاثرکن نہ رہا اور دونوں اوپنرز بڑی اننگز کھیلنے میں ناکام رہے۔ صائم ایوب 7 جبکہ فخر زمان 16 رنز بنا کر پویلین لوٹ گئے۔
ابتدائی نقصان کے بعد بابر اعظم نے بیٹنگ لائن کو سہارا دینے کی کوشش کی اور 6 چوکوں کی مدد سے 45 رنز بنائے، تاہم وہ اپنی اننگز کو مزید آگے نہ بڑھا سکے۔
قومی ٹیم کی جانب سے سعد بیگ نے بھی جارحانہ بیٹنگ کرتے ہوئے 3 چوکوں اور 2 چھکوں کی مدد سے 39 رنز اسکور کیے۔
حسن نواز نے 49 گیندوں پر 37 رنز کی اننگز کھیلی، جس میں 2 چوکے اور 2 چھکے شامل تھے۔
سلمان علی آغا کی سینچری اور دیگر بلے بازوں کی شراکت سے پاکستان 300 رنز کا ہندسہ عبور کرنے میں کامیاب رہا، تاہم پوری ٹیم آخری اوور کی پانچویں گیند پر آؤٹ ہوگئی۔
واضح رہے کہ سہ ملکی ون ڈے سیریز میں پاکستان، سری لنکا اور انگلینڈ کی ٹیمیں شریک ہیں، جبکہ سیریز کے میچز راولپنڈی اور لاہور میں کھیلے جا رہے ہیں۔
