ہالینڈ پاکستان زندہ باد، پاک فوج زندہ باد کے نعروں سے گونج اٹھا، پاک فوج سے اظہار یکجہتی کے لیے نکالی گئی عظیم الشان کار ریلی کے شرکا نے کہا تھا کہ افواج پاکستان پوری قوم کا فخر ہیں، شرکا نے سانحہ 9 مئی کے ذمہ داران کو کڑی سزا دینے کا مطالبہ بھی کیا ہے
سانحہ 9 مئی کی مذمت اور پاک مسلح افواج سے اظہار یکجہتی کے لیے روڑرڈیم میں نکالی گئی کار ریلی میں بچوں اور جوانوں سمیت سمندر پار پاکستانیوں کی بڑی تعداد نے شرکت کی۔ شرکا نے پاکستانی جھنڈے اور پلے کارڈز اٹھا رکھے تھے جن پر پاکستان آرمی کے حق میں نعرے درج تھے۔
شرکا نے پاک فوج زندہ باد اور پاکستان زندہ باد کے فلک شگاف نعرے بھی لگائے، ان کا کہنا تھا کہ سمندر پار پاکستانیوں کے دل پاکستان اور پاک فوج کے ساتھ دھڑکتے ہیں، پاک فوج کے خلاف منفی پروپیگینڈہ کرنے والوں کی شدید مذمت کرتے ہیں۔
کار ریلی میں ملی نغمے بھی چلائے گئے، شرکا نے سبز ہلالی پرچم لہرا کر پاکستان اور افواج پاکستان سے محبت کا اظہار کیا۔ شرکا نے سانحہ 9 مئی کے ذمہ داران کو جلد سے جلد اور کڑی سے کڑی سزا دینے کا مطالبہ بھی کیا ہے۔
