سہ ملکی سیریز، سفیان مقیم اسکواڈ سے باہر، بیٹر معاذ صداقت کی ٹیم میں انٹری

پاکستان کرکٹ بورڈ (پی سی بی ) نے لاہور کی پچز کی نوعیت کے پیش نظر بائیں ہاتھ کے اسپنر سفیان مقیم کو ون ڈے ٹرائی سیریز کے اسکواڈ سے ریلیز کر کے جارحانہ بیٹر معاذ صداقت کو کور کے طور پر شامل کر لیا ہے۔

راولپنڈی میں کھیلے گئے ابتدائی 3 میچوں کے بعد اب سہ فریقی ون ڈے سیریز کا رخ لاہور کے قذافی اسٹیڈیم کی طرف ہو گیا ہے۔

پاکستان نے اب تک اپنے دونوں لیگ میچوں میں شاندار کامیابی حاصل کی ہے، جس میں سری لنکا کے خلاف 37 رنز اور انگلینڈ کے خلاف 87 رنز کی فتح شامل ہے، جبکہ اتوار کو لاہور میں ایک بار پھر پاکستان کا مقابلہ انگلینڈ سے ہے۔

یہ بھی پڑھیں:ٹی 20 رینکنگ: معاذ صداقت ٹاپ 50 میں شامل، سلمان مرزا کی بھی بڑی چھلانگ، بابر اعظم کہاں پہنچے؟

راولپنڈی کی پچز عام طور پر فاسٹ باؤلرز کے لیے سازگار رہی ہیں، جس کی وجہ سے ماہر اسپنرز کے لیے مواقع محدود ہو گئے تھے۔

سفیان مقیم کی ڈومیسٹک کرکٹ میں واپسی

آزاد کشمیر سے تعلق رکھنے والے سفیان مقیم نے 2023 میں اپنے ٹی 20 ڈیبیو کے بعد سے لمیٹڈ اوورز کرکٹ میں پاکستان کی نمائندگی کی ہے۔

وہ زمبابوے کے خلاف صرف 3 رنز کے عوض 5 وکٹیں حاصل کرنے کے ریکارڈ ساز فگرز کی وجہ سے مشہور ہیں، جبکہ انہوں نے پشاور زلمی کی نمائندگی کرتے ہوئے 2026 پاکستان سپر لیگ میں ‘پلیئر آف دی ٹورنامنٹ’ کا اعزاز بھی حاصل کیا۔

ون ڈے فارمیٹ میں وہ 4 میچوں میں 8 وکٹیں اپنے نام کر چکے ہیں۔ پی سی بی کے مطابق لاہور کی پچز کے حالات کو دیکھتے ہوئے انہیں اسکواڈ سے فارغ کر کے ڈومیسٹک کرکٹ میں واپس بھیج دیا گیا ہے۔

معاذ صداقت کی جارحانہ بیٹنگ اور اسکواڈ میں شمولیت

عمر 21 سال کے معاذ صداقت اپنی دھواں دھار اور جارحانہ بیٹنگ کی وجہ سے خاصے مقبول ہیں۔

پشاور سے تعلق رکھنے والے اس بائیں ہاتھ کے بیٹر نے رواں سال کے اوائل میں بنگلہ دیش کے خلاف اپنے ون ڈے ڈیبیو پر فوری طور پر شاندار تاثر چھوڑا اور حال ہی میں سری لنکا کے خلاف ٹی20 سیریز میں مسلسل نصف سینچریاں اسکور کیں۔

مزید پڑھیں:صاحبزادہ فرحان اور معاذ صداقت کی دھواں دار بیٹنگ، پہلے ٹی 20 میں پاکستان نے سری لنکا کو 4 وکٹوں سے شکست دے دی

جس میں 51 گیندوں پر کھیلی گئی 96 رنز کی طوفانی اننگز بھی شامل ہے، جس کی بدولت پاکستان نے ہوم گراؤنڈ پر اپنا سب سے بڑا ٹی 20 ٹوٹل بنایا۔

معاذ صداقت پارٹ ٹائم بائیں ہاتھ کے اسپنر بھی ہیں، تاہم ابتدائی طور پر انہیں اس ٹرائی سیریز کے اسکواڈ میں شامل نہیں کیا گیا تھا۔

شاہین آفریدی کی زیر قیادت ٹائٹل کے لیے تیاریاں

قومی ٹیم کے کپتان شاہین شاہ آفریدی کی قیادت میں اب یہ اپڈیٹڈ اسکواڈ لاہور میں اپنی میچز کا سلسلہ جاری رکھے ہوئے ہے، جہاں 31 اکتوبر کو قذافی اسٹیڈیم میں ہی اس ٹرائی سیریز کا فائنل معرکہ کھیلا جائے گا۔