اسلام آباد ٹریفک پولیس نے کالجز اور یونیورسٹیوں کے طلبہ کے لیے موٹر سائیکل ڈرائیونگ لائسنس کے حصول میں خصوصی سہولت دینے کا فیصلہ کیا ہے، جس کے تحت طلبہ 42 روزہ انتظار کے بغیر اسی روز اپنا لائسنس حاصل کرسکیں گے۔
یہ بھی پڑھیں: اسلام آباد کے شہریوں کو ڈرائیونگ لائسنس کے لیے دفاتر جانے کی ضرورت نہیں، نئی سہولت متعارف
ترجمان اسلام آباد ٹریفک پولیس کے مطابق اس خصوصی سہولت کے تحت موٹر سائیکل لائسنس کے حصول کے لیے 42 روزہ لرننگ پیریڈ کی شرط ختم کردی گئی ہے۔ یہ سہولت یکم نومبر سے 30 نومبر 2026 تک دستیاب ہوگی۔
چیف ٹریفک آفیسر کائنات اظہر خان نے کالجز اور یونیورسٹیوں کے طلبہ کو ہدایت کی ہے کہ وہ اس سہولت سے فائدہ اٹھانے کے لیے اسلام آباد ٹریفک پولیس ہیڈکوارٹرز سے رجوع کریں۔
یہ بھی پڑھیں: ڈرائیونگ لائسنس کے لیے آن لائن درخواست لازمی، اسلام آباد ٹریفک پولیس کا اعلان
کائنات اظہر خان کے مطابق اس اقدام کا مقصد نوجوانوں کو قانونی تقاضوں کے مطابق موٹر سائیکل لائسنس کے حصول میں آسانی فراہم کرنا اور ٹریفک قوانین کی پابندی کو یقینی بنانا ہے۔
