موسمیاتی تبدیلی کے باعث جنوبی ایشیا میں پانی کے وسائل کو غیر معمولی چیلنجز کا سامنا ہے۔ ہمالیہ کے گلیشیئرز تیزی سے پگھل رہے ہیں، مون سون بارشوں کے معمولات تبدیل ہورہے ہیں، جبکہ شدید سیلاب، طویل خشک سالی اور پانی کی قلت جیسے مسائل میں اضافہ ہورہا ہے۔
اس صورت حال میں سندھ طاس معاہدہ دریاؤں کے پانی کی تقسیم اور مشترکہ آبی وسائل کے انتظام کے لیے ایک اہم قانونی اور ادارہ جاتی نظام فراہم کرتا ہے۔ تاہم بھارت کی جانب سے یک طرفہ طور پر معاہدے کو التوا میں رکھنے کے فیصلے نے اس تعاون کے مستقبل پر سوالات کھڑے کردیے ہیں۔
یہ بھی پڑھیں:دریاؤں کا عالمی دن: سندھ طاس معاہدہ اور بھارت کی آبی دہشتگردی
ماہرین کے مطابق موسمیاتی تبدیلی کے باعث دریاؤں کے بہاؤ اور زرعی موسموں میں غیر یقینی بڑھ رہی ہے، ایسے میں معاہدے پر مکمل عمل درآمد پاکستان اور بھارت کے درمیان پانی سے متعلق معاملات کو قابلِ پیشگوئی رکھنے کے لیے ضروری ہے۔ اس کے تحت آبی، موسمیاتی اور ہائیڈرولوجیکل معلومات کا مسلسل تبادلہ سیلاب کی پیشگوئی، خشک سالی سے نمٹنے اور ہنگامی حالات میں مؤثر اقدامات کے لیے اہم کردار ادا کرسکتا ہے۔
سندھ طاس کے آبی نظام کا تحفظ صرف زراعت اور غذائی پیداوار تک محدود نہیں بلکہ اس کا تعلق آبی حیات، آبی علاقوں، جنگلات، مچھلیوں اور حیاتیاتی تنوع سے بھی ہے۔ دریاؤں کے قدرتی بہاؤ کو برقرار رکھنے کے لیے مشترکہ انتظام اور تعاون کی ضرورت ہے۔
موسمیاتی دباؤ کے باعث مشترکہ آبی وسائل پر مسابقت بڑھنے کا خدشہ ہے۔ ایسے حالات میں معاہدے پر عمل درآمد بین الاقوامی قانون کی پاسداری، علاقائی تعاون اور تنازعات کے پُرامن حل کے لیے بنیادی اہمیت رکھتا ہے۔
موسمیاتی تبدیلی کے اثرات سے نمٹنے کے لیے آبی تعاون کو مضبوط بنانا ناگزیر ہے، کیونکہ سندھ طاس میں پانی کی غیر یقینی صورت حال نہ صرف غذائی اور ماحولیاتی تحفظ بلکہ پورے خطے کے امن و استحکام کو بھی متاثر کرسکتی ہے۔
