پاکستان نے اقوامِ متحدہ پر زور دیا ہے کہ وہ مالی مشکلات اور اخراجات میں کمی کے اقدامات کو اپنے امن مشنز کو کمزور کرنے کی اجازت نہ دے۔ پاکستان نے خبردار کیا ہے کہ وسائل میں کٹوتی سے عالمی امن و سلامتی برقرار رکھنے کی تنظیم کی صلاحیت متاثر ہو سکتی ہے۔
یہ انتباہ ایک ایسے وقت میں سامنے آیا ہے جب اقوامِ متحدہ کے امن مشنز کو بڑھتے ہوئے مالی اور سیاسی دباؤ کا سامنا ہے۔ جنرل اسمبلی نے سال 27-2026 کے لیے امن مشنز کی مد میں 5.1 ارب ڈالر کے بجٹ کی منظوری دی ہے، جو گزشتہ سال کے تخصیص کردہ بجٹ سے تقریباً 10 فیصد کم ہے۔ گزشتہ سال پیدا ہونے والے مالی بحران کے باعث اقوامِ متحدہ کو پہلے ہی مشنز کے اخراجات کم کرنے اور امن مشنز میں تعینات اپنے ایک چوتھائی عسکری و پولیس اہلکاروں کو واپس بلانے پر مجبور ہونا پڑا تھا۔
یہ بھی پڑھیے پاکستان کی اقوام متحدہ امن مشنز میں شرکت کو سراہتے ہیں، پولش سفیر
اس پس منظر میں اقوامِ متحدہ میں پاکستان کے مستقل مندوب سفیر سید حیدر شاہ نے ایسی اصلاحات پر زور دیا جو امن مشنز کے طے شدہ مقاصد حاصل کرنے کی صلاحیتوں کو قربان کیے بغیر ان کی کارکردگی میں بہتری لائیں۔
جمال کے روز اقوامِ متحدہ کی جنرل اسمبلی کے 81ویں اجلاس کی چوتھی کمیٹی سے خطاب کرتے ہوئے سفیر سید حیدر شاہ نے کہا ’ضرورت اس بات کی ہے کہ سلامتی کونسل حالات کے تقاضے کے مطابق اس اہم فورم کو استعمال کرنے کا سیاسی عزم دکھائے۔‘
Peacekeeping remains a vital, effective and cost efficient means for ensuring peace and security. It should not become a casualty of geopolitical divisions. This is a moment for reform, but reform with strategic purpose. We should build on peacekeeping’s strengths, not weaken them. When the next ceasefire, political settlement or crisis requires a credible international presence, the United Nations must still have the capacity to respond effectively.
Statement by Ambassador Syed Haider Shah, Permanent Representative of Pakistan to the UN, at the Fourth Committee Agenda “Comprehensive review of the whole question of peacekeeping operations in all their aspects”
Complete video statement below
— Permanent Mission of Pakistan to the UN (@PakistanUN_NY) November 6, 2026
پاکستان اقوامِ متحدہ کے امن مشنز میں سب سے زیادہ اور طویل عرصے تک خدمات انجام دینے والے ممالک میں شامل ہے۔ گزشتہ 6 دہائیوں کے دوران 1 لاکھ 70 ہزار سے زائد پاکستانی عسکری اور پولیس اہلکار اقوامِ متحدہ کے مختلف مشنز میں خدمات انجام دے چکے ہیں، جن میں سے 183 اہلکاروں نے جامِ شہادت نوش کیا۔ اس کے علاوہ پاکستان میں ‘اقوامِ متحدہ کا ملٹری آبزرور گروپ برائے بھارت و پاکستان’ (UNMOGIP) بھی قائم ہے۔
سفیر سید حیدر شاہ کا یہ موقف ایسے وقت میں سامنے آیا ہے جب امن مشنز نہ صرف مالی مشکلات بلکہ پیچیدہ سیاسی اور سیکیورٹی چیلنجز سے بھی نبرد آزما ہیں۔ انہوں نے دلیل دی کہ علاقائی انتظامات اور عارضی بنیادوں پر چلائے جانے والے آپریشنز پر بڑھتا ہوا انحصار اس بات کا ثبوت ہے کہ میدانِ عمل میں اقوامِ متحدہ کی معتبر موجودگی کی اہمیت آج بھی پہلے کی طرح برقرار ہے۔
اقوامِ متحدہ کے سیکرٹری جنرل کی جانب سے امن مشنز کے جائزہ کا خیرمقدم کرتے ہوئے پاکستان نے اصلاحات کے لیے مندرجہ ذیل 6 ترجیحات کا خاکہ پیش کیا۔
سیاسی حل کو پہلی ترجیح دینا، واضح اور بابلاطہ وسائل سے لیس مقاصد کا تعین، امن مشنز کی ادارہ جاتی صلاحیتوں کا تحفظ، مستقبل کی عسکری و پولیس ضروریات کے لیے پیشگی تیاری، امن اہلکاروں کی حفاظت اور سیکیورٹی کو یقینی بنانا اور امن مشنز کو اقوامِ متحدہ کی اجتماعی ذمہ داری کے طور پر برقرار رکھنا۔
پاکستان کا بنیادی نکتہ یہ تھا کہ امن مشنز کو سونپی گئی ذمہ داریوں اور انہیں فراہم کیے جانے والے وسائل کے درمیان فاصلہ مسلسل بڑھ رہا ہے۔
پاکستان نے خبردار کیا کہ مالی حد بندیوں (بجٹ کی حدود) کو آپریشنل ضروریات طے کرنے کا معیار نہ بنایا جائے۔ سفیر سید حیدر شاہ نے موقف اپنایا کہ پہلے سیاسی اہداف سے یہ طے ہونا چاہیے کہ مشن سے کیا توقعات ہیں، اور پھر ان مقاصد کی روشنی میں درکار اہلکاروں، سامان اور مالی وسائل کا تعین کیا جانا چاہیے۔
امن مشنز تنازعات کو کم کرنے، شہریوں کے تحفظ، جنگ بندی کو برقرار رکھنے اور مذاکرات کے لیے راہ ہموار کرنے میں مددگار ثابت ہوتے ہیں۔ تاہم، یہ تمام افعال سیاسی عمل اور مناسب آپریشنل صلاحیتوں کے باہمی تعاون پر منحصر ہیں۔
پاکستان نے رکن ممالک پر زور دیا کہ وہ اقوامِ متحدہ کے امن مشنز کے منفرد فوائد کو برقرار رکھیں، جن میں ان کی عالمی مقبولیت، قابلِ اعتماد مالی معاونت، بہترین کمانڈ اور لاجسٹکس سسٹم، اور رکن ممالک کی طرف سے ماہر اہلکار اور تکنیکی صلاحیتیں حاصل کرنے کی صلاحیت شامل ہے۔
سفیرِ پاکستان کا کہنا تھا ’کفایت شعاری اور اخراجات میں کمی کا مقصد امن مشنز کو زیادہ مضبوط بنانا ہونا چاہیے، نہ کہ ان صلاحیتوں کو ختم کرنا جو اقوامِ متحدہ کے امن مشنز کو منفرد اور بااثر بناتی ہیں۔‘
یہ بھی پڑھیے اقوام متحدہ کے امن مشنز عالمی امن کی امید ہیں، وزیراعظم شہباز شریف
امن اہلکاروں کا تحفظ اور ان کے خلاف جرائم پر احتساب کو یقینی بنانا پاکستانی مستقل مندوب کے خطاب کا ایک اہم جزو تھا۔
واضح رہے کہ پاکستان نے ڈنمارک کے ساتھ مل کر اقوامِ متحدہ کی سلامتی کونسل کی قرارداد 2823 کو پیش کرنے میں کلیدی کردار ادا کیا، جسے 153 ممالک کی ریکارڈر اسپانسرشپ کے ساتھ متفقہ طور پر منظور کیا گیا تھا۔ اس قرارداد کا مقصد امن اہلکاروں کے خلاف جرائم پر سخت احتساب قائم کرنا ہے۔ یہ ایک ایسا معاملہ ہے جسے پاکستان اقوامِ متحدہ کے پلیٹ فارم پر مسلسل اٹھاتا رہا ہے۔
امن اہلکاروں کے خلاف جرائم کے احتساب پر سیکرٹری جنرل کی پہلی رپورٹ کا خیرمقدم کرتے ہوئے سفیر سید حیدر شاہ نے اس معاملے پر اسسٹنٹ سیکرٹری جنرل ایلیزابیتھ اسپیہار کو سینئر فوکل پرسن مقرر کرنے کے فیصلے کو سراہا۔
انہوں نے اس قرارداد پر مؤثر عملدرآمد کا مطالبہ کیا جس میں تحقیقات اور مقدمات کو مضبوط بنانے، کیسز کی بہتر نگرانی، اور قومی عدالتوں کی صلاحیتوں میں اضافہ شامل ہے تاکہ امن اہلکاروں پر حملہ کرنے والوں کو انصاف کے کٹہرے میں لایا جا سکے۔
#PakistanAtUN
Pakistan Calls for Strategic, Well-Resourced and Effective UN Peacekeeping Reform
Ambassador Syed Haider Shah Highlights Role of Resolution 2823 in Advancing Accountability for Crimes Against Peacekeepers
– Our Press Release
— Permanent Mission of Pakistan to the UN (@PakistanUN_NY) November 6, 2026
پاکستان نے امن مشنز سے متعلق خصوص کمیٹی (C-34) کی اہمیت پر بھی زور دیا اور اسے امن پالیسیوں کو اجتماعی شکل دینے والا سب سے بڑا بین الحکومتی فورم قرار دیا۔ کمیٹی کے اندر پیدا ہونے والی ہم آہنگی اور قرارداد 2823 کی وسیع حمایت نے یہ ثابت کیا ہے کہ رکن ممالک اب بھی امن مشنز کو بین الاقوامی تعاون کا ایک اہم ذریعہ سمجھتے ہیں۔
پاکستان کا موقف ہے کہ اصلاحات کا مقصد امن مشنز کو مزید مؤثر اور تبدیل ہوتے حالات کے مطابق ڈھالنا ہونا چاہیے، نہ کہ ایسے وقت میں ادارے کو کمزور کرنا جب بین الاقوامی تنازعات اور سیاسی کشیدگی کی وجہ سے اس کا کردار پہلے سے زیادہ اہم ہو چکا ہے۔
سفیر سید حیدر شاہ نے اپنے خطاب کے اختتام پر کہا ’امن و سلامتی کو یقینی بنانے کے لیے امن مشنز آج بھی ایک اہم، مؤثر اور کم خرچ ذریعہ ہیں۔ ہمیں آئندہ بھی اس کا سہارا لینا پڑے گا، لہٰذا ہمیں یہ یقینی بنانا ہوگا کہ جب بھی ضرورت پڑے، یہ ادارہ مکمل طور پر تیار ہو۔‘
