بالی ووڈ کی سینئیر اداکارہ ریکھا نے 2014ء کے بعد کوئی پروجیکٹ کیوں نہیں کیا؟ اس سوال کا جواب اداکارہ ریکھا نے خود دیدیا ہے۔ اداکارہ نے ایک عرب میگزین کو انٹرویو دیا ہے، میگزین کے سر ورق پر اداکارہ ریکھا کی تصویر نے انٹر نیٹ پر مداحوں کے دل جیت لیے ہیں۔
2014 کے بعد سے ریکھا نے کسی پروجیکٹ میں کام کیوں نہیں کیا؟
عرب میگزین کو انٹرویو دیتے ہوئے ریکھا نے وضاحت کی کہ انہوں نے 2014 کے بعد سے کسی پروجیکٹ میں کام کیوں نہیں کیا۔ ریکھا نے کہا کہ ’چاہے میں فلمیں بناؤں یا نہ بناؤں، یہ مجھے کبھی نہیں چھوڑتیں، میرے پاس اپنی یادیں ہیں جن سے میں پیار کرتی ہوں۔ صحیح وقت پر صحیح پروجیکٹ مجھے مل جائے گا۔‘
’ میری ذاتی شخصیت میری اپنی ہے لیکن میری فلمی شخصیت دیکھنے والوں کی نظر میں ہے۔ اس لیے میں انتخاب کرتی ہوں کہ کہاں مجھے ہونا چاہیے اور کہاں نہیں ہونا چاہیے۔ میں بہت خوش قسمت ہوں کہ مجھے اپنی پسند کے انتخاب کا حق حاصل ہے، عیش و عشرت کے بجائے سادگی پسند ہوں۔‘
اداکارہ ریکھا سے پوچھا گیا کہ ‘جب آپ کسی سے یا کسی چیز سے بہت گہری محبت کرتے ہیں تو کیا محبت ختم ہو جاتی ہے؟’ تو ریکھا نے جواب دیا، “نہیں۔ ایک بار جب رشتہ قائم ہو جاتا ہے تو یہ ہمیشہ کے لیے ہوتا ہے۔ کبھی کبھی ہم زیادہ چاہتے ہیں اور کبھی کبھی یہ کافی ہوتا ہے۔ یہ میرے فن پر لاگو ہوتا ہے۔ یقینی طور پر میں اداکاری کے لیے پیدا ہوئی ہوں لیکن اداکاری سیکھنے کے لیے میں نے سخت محنت کی ہے۔‘
’ اپنی خوبصورتی کو مثبت چیزوں میں تلاش کرنا چاہیے منفی نہیں، مثبت سوچ کے ساتھ میں ہر روز ایک نیا جذبہ محسوس کرتی ہوں اور میں ان لوگوں پر بھروسہ کرتی ہوں جو میری طرح پرعزم ہیں۔‘
اداکارہ ریکھا حال ہی میں ٹی وی شو ’گُم ہے کسی کے پیار میں‘ کے پرومو میں چھوٹی اسکرین پر نظر آئی تھیں اور مداح اب بھی اس انتظار میں ہیں کہ ریکھا کسی نئے پروجیکٹ کا اعلان کریں گی۔‘
ریکھا کا فلمی سفر
ریکھا نے اپنے کیریئر کا آغاز بطور چائلڈ ایکٹر تیلگو فلموں انٹی گٹو (1958) اور رنگولا رتنم (1966) سے کیا جبکہ مرکزی کردار کے طور پر ان کی پہلی فلم آپریشن جیک پاٹ نالی (1969)C.I.D 999 تھی۔ ریکھا نے ساون بھادون (1970) سے ہندی میں قدم رکھا۔ ان کی آخری مکمل فلم سپر نانی تھی، ریکھا آخری بار 2014 میں فلم ‘ سپر نانی’ میں سینما اسکرین پر آئی تھیں۔
