پاکستان خود مختار ملک، ملکی معیشت درست سمت پر گامزن ہے، اسحاق ڈار

وفاقی وزیر خزانہ اسحاق ڈار نے کہا ہے کہ پاکستان ایک خود مختار ملک ہے اور ہم درست معاشی سمت کی جانب گامزن ہیں۔

اسلام آباد میں ’منرل سمٹ‘ سے خطاب کرتے ہوئے اسحاق ڈار نے کہا کہ پاکستان میں 6 ٹریلین کے معدنیات کے ذخائر موجود ہیں، دوست ملک اور عالمی کمپنیاں سرمایہ کاری کی خواہشمند ہیں۔

وفاقی وزیر نے کہا کہ پاکستان کے پاس اربوں ڈالر کا گیس پائپ لائن کا نظام ہے، زراعت، آئی ٹی اور معدنیات کے شعبوں پر خصوصی توجہ دی جا رہی ہے۔

انہوں نے کہا کہ ہم نے ماضی میں بھی میثاق معیشت کی بات کی تھی، اب بھی اس کی ضرورت ہے۔

اسحاق ڈار نے کہا کہ آہستہ آہستہ ملکی معیشت ترقی کر رہی ہے۔

وزیر خزانہ نے کہا کہ پاکستان ذمہ دار ملک ہے، ہم  دوست ممالک کے ساتھ کیے گئے معاہدوں کو پورا کریں گے، عوام کو یقین دلاتا ہوں کہ پاکستان کبھی ڈیفالٹ نہیں کرے گا۔

قبل ازیں وزیراعظم پاکستان شہباز شریف اور آرمی چیف جنرل سیّد عاصم منیر نے بھی منرل سمٹ سے خطاب کیا۔

یہ بھی پڑھیں 75 سال میں اپنی قیمتی دولت پر توجہ نہیں دی لیکن اب دیں گے، شہباز شریف

وزیر اعظم نے کہاکہ ہمارے پاس تھرکول دنیا میں کوئلے کے منصوبوں میں سے ایک ہے، اس کے علاوہ ملک کے 6 لاکھ مربع کلو میٹر پر معدنی ذخائر موجود ہیں، گزشتہ 75 سال میں ہم  نے اپنی قیمتی دولت پر توجہ نہیں دی۔ کیا ہم کسی کارٹیل یا سیاسی وجوہات کی بنا پر تذبذب کا شکار تھے۔

وزیر اعظم شہباز شریف کا کہنا تھا کہ آئندہ چند سال میں کھویا ہوا مقام واپس حاصل کریں گے، باتیں بہت ہو چکی ہیں اب عمل سے ترقی کے اہداف حاصل کرنے کی ضرورت ہے، محنت اور لگن سے ہم اپنی منزل حاصل کر سکتے ہیں۔

یہ بھی پڑھیں مشکل گھڑی میں قوم امید کا دامن تھامے رکھے، آرمی چیف سید عاصم منیر